Германија повика на прекин на војната во Газа

БЕРЛИН (АА) - Германската министерка за надворешни работи Аналена Баербок денес повика да се прекине војната во Газа поради зголемениот број цивилни жртви поради нападите на Израел врз Палестинците, јавува Анадолу.

„Оваа војна во Газа мора конечно да заврши. Нема безбедни места за цивилите во Газа. Речиси 80 отсто од Појасот Газа е прогласена за зона за евакуација од страна на израелската Армија - децата, болните, постарите и бремените жени мора да ги напуштат овие подрачја. Дури и ретките и апсолутно пренаселени места кои израелската војска ги прогласи за безбедни зони повеќе пати беа погодени“, рече Баербок.

Таа повтори дека Израел има право да се брани од тероризмот, но исто така јасно стави до знаење дека „меѓународното хуманитарно право поставува граници на секоја војна“.

„Армијата е должна да го заштити цивилното население. Бидејќи луѓето не можат едноставно да исчезнат, итно им е потребна поддршка и безбедност“, рече германскиот министер.

Прекршувајќи ја резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради неговата континуирана брутална офанзива со неселективно бомбардирање на цивилните населби, училишта, верски објекти и болници на Појасот Газа на 7 октомври минатата година.

Оттогаш, во израелските напади врз Појасот Газа се убиени 38.848 Палестинци, а 89.459 се ранети.

Во период од девет месеци континуирано бомбардирање и гранатирање од страна на Израел, големи делови од Газа се во урнатини.

Израел е обвинет за геноцид пред Меѓународниот суд на правдата, чија последна пресуда им наложи на израелските власти веднаш да ја прекинат воената операција во јужниот град Рафа.