Ayhan Şimşek
17 Август 2026•Ажурирано: 17 Август 2026
Германската Социјалдемократска партија (СПД) повикува на промена на Уставот со цел проширување на федералното финансирање за мерки за приспособување кон климатските промени, додека земјата се соочува со сè почести топлотни бранови, суши, шумски пожари и недостиг на вода, јавува Анадолу.
Во акцискиот план од 4 страници за кој денес извести јавниот радиодифузер ЗДФ, министрите од СПД – помал коалициски партнер во Владата на канцеларот Фридрих Мерц – предложија национален план за справување со топлотните бранови, измени во законите за урбанистичко планирање и градење, како и посилна заштита на работниците изложени на екстремни температури.
Министрите истакнаа дека уставната промена е неопходна за да може федералната Влада да помогне во финансирањето на мерките кои во моментов главно се во надлежност на сојузните покраини и општините.
Таквата промена е „предуслов“ федералната Влада да учествува во финансирањето на задачите на општините или сојузните покраини „и на тој начин долгорочно, правно сигурно и сеопфатно да придонесе за мерките за приспособување кон климатските промени и зачувување на природата“, се наведува во документот.
„Последиците од климатските промени ги погодуваат луѓето низ светот, а сè повеќе и нас во Германија“, напишаа министрите, наведувајќи ги топлотните бранови, сушите, шумските пожари, ниските водостои, обилните врнежи, поплавите, недостигот на вода и изложеноста на ултравиолетово зрачење.
Предлогот е одобрен од министрите од СПД задолжени за финансии, животна средина, труд и социјални прашања, градежништво и развој.
Конзервативниот блок ЦДУ/ЦСУ на канцеларот Мерц досега скептично реагираше на предлозите. Претставници на партијата во изјави за локалните медиуми ја доведоа во прашање практичната корист од измената на Уставот и укажаа на тешкотијата да се обезбеди потребното двотретинско мнозинство во Парламентот.
Извори од СПД соопштија дека предлозите ќе бидат разгледани меѓу коалициските партии во наредните денови.
