Градоначалникот на Истанбул, Екрем Имамоглу, уапсен од Кривичниот суд под обвинениja за корупција

ИСТАНБУЛ (АА) - Градоначалникот на Истанбул, Екрем Имамоглу, е уапсен денес од страна на надлежниот Кривичен суд во рамките на истрагата за корупција во Општината на метрополата Истанбул, јавува Анадолу.

Главното јавно обвинителство на Истанбул во официјалното соопштение истакнува: „Во рамките на истрагите што ги спроведува нашето Главно јавно обвинителство, надлежниот Магистратен суд одлучи да го уапси осомничениот Екрем Имамоглу, под обвинение за основање и водење на криминална организација, примање мито, изнуда, незаконско регистрирање на лични податоци и мешање во тендер, во рамките на финансиска истрага“.

Канцеларијата на главниот јавен обвинител на Истанбул започна истрага против Имамоглу и 99 други осомничени под обвинение за водење криминална организација, членство во криминална организација, проневера, мито, тешка измама, незаконско преземање лични податоци и местење јавни тендери.

По нивно процесирање во полициска станица, дел од осомничените се префрлени во зградата на Судот во Истанбул во Чаглајан, каде што се одвиваше нивната постапка пред надлежниот Кривичен суд.

Судот донесе одлука за апсење на Имамоглу.

Мурат Онгун, помошникот на Имамоглу и претседател на „Медија Инк.“, компанија во сопственост на општината, заедно со генералниот директор на компанијата „Имамоглу Иншаат“, Тунџај Јилмаз, исто така се уапсени како дел од истрагата.

Постапката за останатите осомничени е во тек.