Tarek Chouiref
17 Септември 2025•Ажурирај: 17 Септември 2025
ГАЗА/ИСТАНБУЛ (АА) – Израелската Армија денес соопшти дека во последните два дена извршила повеќе од 150 воздушни и артилериски напади врз Газа, како дел од проширената копнена офанзива со цел окупација на најголемиот урбан центар во енклавата, јавува Анадолу.
Според снимки објавени од Армијата, израелските трупи се наоѓаат во делови од градот, а командантите објавија дека започнува нова фаза на офанзивата.
Сепак, очевидци и локални извори за Анадолу изјавија дека нема широка копнена инвазија, туку засилено гранатирање, напади со беспилотни летала и употреба на далечински управувани експлозиви кои принудија илјадници жители да го напуштат градот.
Воените претставници изјавија дека 98-та и 162-рата Дивизија „ги продлабочуваат своите маневри“ во рамките на операцијата „Гидеонови кочии 2“. Тие предупредија дека нападот во градот Газа може да трае со месеци.
Во исто време, палестинскиот телекомуникациски оператор „Палтел“ потврди прекин на фиксниот интернет и телефонските услуги во градот Газа и северниот дел на Газа, откако израелските напади ги оштетија клучните мрежни линии. Жителите пријавија целосни прекини во повеќе населби.
„Нашите тимови работат деноноќно за да ги поправат линиите под опасни услови“, соопшти компанијата.
Кампањата во Газа доаѓа по неколку недели откако израелската Влада го одобри планот на премиерот Бенјамин Нетанјаху за повторно окупирање на целиот Појас Газа, почнувајќи од густо населениот град.
Од почетокот на август, израелските сили бомбардираат станбени згради и станбени блокови, користејќи артилерија, напади со беспилотни летала и роботи поставени на стапици.
Опозициските лидери и семејствата на заложниците во Израел го обвинуваат Нетанјаху за продолжување на војната за политички опстанок, предупредувајќи дека секое повлекување од Газа би можело да ја собори неговата коалиција. Меѓународните групи, исто така, изразија загриженост за катастрофалните последици за цивилите.
Израелската Армија уби речиси 65.000 Палестинци, повеќето од нив жени и деца, во Газа од октомври 2023 година. Немилосрдното бомбардирање ја направи енклавата ненаселена и доведе до глад и ширење болести.
