Израелската армија објави почеток на „воена офанзива“ во јужниот дел на Појасот Газа

АНКАРА (АА) - Израелската војска денес објави дека започнала „воена офанзива“ врз подрачјето на Кан Јунис во јужниот дел на Појасот Газа, јавува Анадолу.

Израелската војска преку соопштение истакна дека офанзивата се заснова врз разузнавачки информации што укажуваат на присуство на „инфраструктури на Хамас и Исламски џихад и оперативци во јужниот дел на Појасот Газа“.

Израелската војска претходно под ист изговор ја нападна областа Кан Јунис преполна со раселени цивили.

И покрај вчерашните апели од посредниците, меѓу кои се и Египет, САД и Катар, да се запрат непријателствата, да се постигне прекин на огнот и договор за размена на заложници, Израел продолжува со својата смртоносна офанзива во Појасот Газа.

Оваа ескалација доаѓа во услови на зголемени стравувања од поширока војна, особено поради тоа што либанската група Хезболах се заканува со воена одмазда по убиството на нејзиниот висок командант Фуад Шукр во израелскиот воздушен напад во Бејрут на 30 јули, а Иран предупредува на одмазда по атентатот на шефот на Политичкото биро на Хамас, Исмаил Ханије, во Техеран на 31 јули, што му се припишува на Тел Авив.

Во израелските напади врз Појасот Газа од октомври загинаа речиси 39.700 луѓе.

Израел е обвинет за геноцид пред Меѓународниот суд на правдата, кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.