Ahmed Asmar
26 Декември 2023•Ажурирај: 27 Декември 2023
КУДС (АА) - Израелската армија соопшти дека по грешка убила двајца свои војници за време на воената операција во Појасот Газа минатиот месец, пренесува Анадолу.
Според Армиското радио, израелски тенк забележал сомнителни движења во една зграда и решиле да го гранатира нејзиниот втор кат, што резултирало со смрт на војниците.
Подоцна е утврдено дека зградата била користена како база од страна на командантот на пешадијата во опколената енклава.
Израел изгуби најмалку 491 војник од почетокот на последниот конфликт во Газа по нападот на Хамас на 7 октомври.
Како одговор на прекуграничната офанзива на палестинската група, Израел започна воздушни и копнени напади на крајбрежната територија и оттогаш уби повеќе од 20.000 луѓе, од кои повеќето жени и деца.
Нападот ја остави Газа во урнатини, при што 60 отсто од инфраструктурата на енклавата е оштетена или уништена, а речиси 2 милиона луѓе се раселени поради сериозен недостиг на храна, чиста вода и лекови.
Премиерот Бенјамин Нетанјаху, кој ги отфрли меѓународните повици за прекин на огнот, во понеделникот рече „не запираме“ и „војната ќе продолжи докрај“.
Тел Авив вети дека ќе го уништи Хамас и ќе обезбеди ослободување на сите заложници земени за време на нападот во октомври. Некои од нив се вратија по привременото примирје во ноември со размена на некои палестински затвореници.
