Израелски борбен авион случајно исфрлил бомба во близина на границата со Газа

ЕРУСАЛИМ (АА) – Израелски борбен авион поради „технички дефект“ случајно исфрлил бомба во близина на населбата Нир Јицхак, на границата со Газа, соопшти израелската Армија, јавува Анадолу.

Во соопштението се наведува дека муницијата паднала на отворено подрачје во близина на населбата и дека при инцидентот нема повредени лица. Случајот е предмет на истрага.

Локални жители за весникот „Једиот ахронот“ изјавија дека не забележале ништо невообичаено, бидејќи се навикнати на честите експлозии што доаѓаат од воените активности во Газа. Тие слушнале експлозија, но не се посомневале дека станува збор за нешто различно.

Ова не е прв ваков инцидент откако Израел започна со геноцидната офанзива врз Газа. Во јуни 2024 година, тенковски проектил наменет за цели во Газа залутал и завршил на израелска територија, близу до граничната ограда.

Еден месец претходно, 500-килограмска бомба исфрлена од авион „Ф-15“ била пронајдена неексплодирана меѓу куќи во населбата Мошав Јатед во реонот Ешкол, што Армијата го оцени како „исклучителен, редок и опасен“ настан.

Израелската Армија ја обнови смртоносната офанзива врз Газа на 18 март, со што го наруши прекинот на огнот и договорот за размена на затвореници што беше постигнат во јануари.

Од почетокот на израелската офанзива врз Газа, во октомври 2023 година, досега загинале најмалку 51.000 Палестинци, најголем дел од нив жени и деца.

Меѓународниот кривичен суд во ноември издаде налог за апсење на израелскиот премиер Бенјамин Нетанјаху и поранешниот министер за одбрана Јоав Галант поради воени злосторства и злосторства против човештвото во Газа.

Истовремено, Израел се соочува со тужба за геноцид пред Меѓународниот суд на правдата поради војната против оваа палестинска енклава.