Израелските сили уништија палестинска куќа во Западниот Брег

ХЕБРОН

Израелските воени сили денес уништија палестинска куќа во Западниот Брег во последното уривање на окупираната територија, јавува Агенција Анадолија (АА).

„Израелските власти го наведоа недостатокот на градежна дозвола како причина за уривање на куќата во градот Џабал ал-Сундас во Хеброн“, изјави Мохамед ал-Атраш за АА.

Уривањето на куќата предизвикало судири меѓу гневните палестински жители и израелските сили, според репортерот на АА од теренот.

Двокатната куќа се наоѓала во областа Ц, која е под административна и безбедносна контрола на Израел додека не се постигне договор за конечниот статус со Палестинците.

Според Договорот од Осло од 1995 година меѓу Израел и палестинската управа, Западниот Брег, вклучувајќи го и Источен Ерусалим, се поделени на три дела - област А, Б и Ц.

Според Канцеларијата на ОН за координација на хуманитарните прашања (OCHA), вкупно 768 палестински структури во областа Ц и во окупираниот Источен Ерусалим биле урнати од страна на Израел помеѓу јануари и ноември 2021 година.