Mücahit Oktay
18 Мај 2021•Ажурирај: 20 Мај 2021
ЊУЈОРК (АА) - Истакнати личности од Соединетите Американски Држави (САД) на своите профили на социјалните мрежи продолжија да реагираат на насилството на Израел врз Палестинците и на американската помош за Израел, пренесува Агенција Анадолија (АА).
Голем број американски истакнати личности го критикуваа насилството и расистичкото однесување на израелската Армија врз Палестинците во окупираниот Источен Кудс (Ерусалим) и Појасот Газа и истакнаа дека треба да биде запрена годишната помош за Израел во износ од 3,8 милијарди долари.
Наградуваната филмска актерка Сузан Сарандон, која е запаметена по нејзините улоги во филмовите „Лоренцовото масло“ и „Клиент“, го сподели видеото што се најде и на турските медиуми, на кое 10-годишната Надин Абдел-Таиф од Газа пролева солзи пред зградите уништени од израелското бомбардирање на Газа. Сарандон на својот профил сподели и графикон на кој се прикажани бројките на деца и жени цивили што ги загубија своите животи.
Сарандон во својата објава во врска со американската помош за Израел истакна:
„Ние испраќаме 3,8 милијарди долари годишно во Израел. Ова се 10 милиони долари на ден. И додека сè уште не можеме да ја спроведеме програмата за бесплатни оброци во нашата земја, нашите даноци го финансираат расизмот.
За разлика од нас, Израел има бесплатен здравствен систем и подобар животен стандард, но ние сепак продолжуваме да испраќаме 3,8 милијарди долари годишно. Ова вреди да се осуди.“
- „Ако нешто ми се случи, простете ми, бидејќи морам оваа порака да му ја пренесам на светот“ -
Друга позната личност која ги критикуваше нападите на Израел е американската авторка Наоми Клајн, која се наоѓа на листата автори на бестселери на „Њујорк тајмс“ и чии наградувани книги се преведени на повеќе од 30 јазици.
Покрај снимките на кои израелските војници им ставаат лисици на Палестинките и фрлаат солзавци врз луѓето што се клањаат во Месџид ал-Акса, американската авторка ги сподели и фотографиите што ги прикажуваат моментите кога израелските воени авиони со своите ракети ја урнаа зградата „Џела“, во која се наоѓаа и канцелариите на новинската агенција „Асошиејтед прес“ (АП) и телевизијата „Ал-Џезира“.
Под оваа фотографија, Клајн сподели и линк на дел од интервјуто на палестинскиот репортер Јумна ал-Сајед, во кое е цитирана неговата изјава во која тој, одејќи на работа, секој ден се збогува од своите 4 деца, велејќи: „Ако нешто ми се случи, простете ми, бидејќи ова е моја должност и јас морам оваа порака да му ја пренесам на светот.“
Опишувајќи се како новинарка, писателка, филмска продуцентка и активистка, Клајн на сопствената страница на социјалната мрежа Твитер, под хаштагот „Спаси го Шеик Џара“ и „Газа е под напад“, им даде место на изјавите: „Ризикувај ги својата позиција и привилегија и зборувај. Не мора да биде на социјалните мрежи, но некаде мора, на работа или дома. Напиши писмо, потпиши петиција.“
- И Сноуден беше меѓу оние што реагираа на однесувањето на Израел -
Едвард Сноуден, поранешен вработен во Агенцијата за национална безбедност на САД (НСА), им се приклучи на американските истакнати личности кои реагираа на односот на Израел по објавата на АП за деталите во врска со нападот на израелските воени авиони, во кој беше погодена зградата во која се наоѓаат канцелариите на оваа новинска агенција во Газа.
Сноуден во објавата во која ја сподели фотографијата од изјавата на АП наведе: „Во изјавата на АП директно се оспоруваат тврдењата на израелската Армија дадени како образложение за разнесувањето на зградите, наведувајќи дека АП не забележал никакви индикации дека Хамас е таму присутен или дека има свои активности.“
Абрахам Гутман, писател од еврејско потекло од медиумската куќа „Филаделфија инквајрер“ („Philadelphia Inquirer“), објавувајќи многу текстови во кои го критикува Израел, истакна: „Ако сте загрижени за антисемитизмот, тогаш треба да бидете лути и што воените авиони, што ја носат Sвездата на Давид, фрлаа бомби кои убиваа жени и деца во име на еврејската држава и народ.“
И покрај обвиненијата дека Хамас користи станбени области како „жив штит“, под текстот „Би сакал да ве потсетам дека Хакирја, врвната израелска воена база е сместена во центарот на Тел Авив, веднаш спроти музејот на уметноста, два трговски центри, средно училиште и куќи во кои живеат цивили“ Гутман ја сподели фотографијата од воената база „Хакирја“, што се наоѓа во строгиот центар на Тел Авив.
