Канцеларијата за хуманитарни работи на ОН: Газа се соочува со катастрофални нивоа на глад

ЖЕНЕВА (АА) - Канцеларијата за хуманитарни работи на Обединетите нации денес соопшти дека доставата на хуманитарна помош во Газа е сериозно ограничена, велејќи дека моменталниот проток на храна е во многу мала количина, при што областа се соочува со катастрофални нивоа на глад, јавува Анадолу.

Јенс Лаерке, портпаролот на Канцеларијата на ОН за координација на хуманитарни прашања (OCHA), за време на прес-конференцијата во Женева изјави дека малата количина храна ја носи областа на работ на катастрофален глад.

Во текот на изминатите 10 дена од повторното отворање на некои влезни точки во Газа, на речиси 900 камиони им беше одобрен влез. Сепак, Лаерке рече дека само околу 600 биле истоварени на страната од Газа, а уште помалку биле дистрибуирани поради оперативните тесни грла.

„Рутите што ни се доделуваат од израелските власти често се пренатрупани, небезбедни и со значителни доцнења при добивањето потребни одобренија“, рече тој.

Лаерке ја критикуваше состојбата, велејќи дека ова е една од најопструираните хуманитарни операции во поновата историја. „Операцијата што ја имаме подготвено е ставена во оперативна стега што ја прави една од најопструираните во светот денес, па дури и во поновата историја на глобалниот хуманитарен одговор“, рече тој.

Како главен проблем ја посочи контролата што Израел ја има врз доставата на помошта.

„Блокадата и временската контрола на операцијата се наметнати од страна на една од страните во конфликтот – окупациската сила, Израел“, додаде Лаерке.

Тој ја отфрли и израелската алтернатива за дистрибуција на помош преку новоформирана фондација со поддршка на САД. „Предлогот што го дадоа не е ниту непристрасен, ниту независен, ниту функционален“, истакна тој.

Според ОН, десетици илјади палети со храна и други животоспасувачки средства се подготвени за влез во Газа, но остануваат блокирани.

На израелските тврдења дека постои ризик хуманитарната помош да падне во „погрешни раце“, ОН одговорија дека немаат нови докази за такво нешто.

„Загриженоста за злоупотреба на помошта, без нови докази, не може да биде оправдување за блокирање на операција што спасува животи“, рече Лаерке.

„ОН и нашите партнери имаат строги системи за следење и безбедност на секоја испорака што ја раководиме, и досега не сме забележале сериозни злоупотреби.“

„Она што се случува надвор од системот што ние го контролираме не е наша одговорност“, додаде тој. „Нашата одговорност е помошта што ја носиме и таа е строго контролирана.“

Повикувајќи на итни промени на теренот, Лаерке рече: „Потребно е повторно отворање на сите гранични премини кон Газа – помош преку сите коридори, вклучувајќи ги и оние од Јордан и Египет.“

„Мораме да можеме да доставиме храна директно до семејствата, до нивните домови. Нашата одговорност на крајот на денот е кон луѓето што ги служиме, а не кон никој друг“, заврши тој со повик: „Потребно е сите страни да го почитуваат меѓународното право.“