Ердоган: Туркије се надева дека прекинот на огнот во Газа ќе ја отвори вратата за траен мир

ИСТАНБУЛ (АА) - Туркије се надева дека договорот за прекин на огнот во Газа ќе ја отвори вратата за траен мир и стабилност за „нашите браќа и сестри Палестинци“, како и за регионот и целото човештво, рече денес турскиот претседател Реџеп Таип Ердоган, јавува Анадолу.

Туркије ќе продолжи да стои покрај населението на Газа и да ги мобилизира сите средства за да и помогне на Газа да заздрави и да застане на нозе, порача Ердоган преку платформата X, нагласувајќи дека Туркије го поздравува договорот за прекин на огнот меѓу палестинската група Хамас и Израел.

„Ги поздравуваме херојскиот народ и храбрите синови и ќерки на Газа кои храбро ја бранат својата земја и слободи пред израелските незаконски и нехумани напади“, истакна тој.

Туркије никогаш не ги остави сами своите „палестински браќа и сестри“ во нивната борба против угнетувањето и угнетувачите, додаде Ердоган.

Претходно, катарскиот премиер и министер за надворешни работи Мухамед бин Абдулрахман го објави успехот на посредниците во постигнувањето договор за прекин на огнот во Појасот Газа, истакнувајќи дека неговото спроведување ќе започне во недела.