Кинескиот претседател Си Ѓинпинг го прими сирискиот претседател Башар ал Асад

ИСТАНБУЛ (АА) - Кина и Сирија денес ги унапредија своите билатерални односи на ниво на стратегиско партнерство за време на средбата помеѓу кинескиот претседател Си Ѓинпинг и неговиот сириски колега Башар ал Асад кој престојува во посета на земјата, соопшти Пекинг, јавува Анадолу.

Хуа Чунјинг, портпаролката на кинеското Министерство за надворешни работи, рече дека воспоставувањето на стратегиското партнерство „ќе биде значајна пресвртница во историјата на кинеско-сириските односи каде што двете страни се надоврзуваат на минатото и се движат кон иднината“.

„Кинеската страна е подготвена да работи со сириската страна за цврсто да се поддржуваме едни со други и заеднички да ја поддржуваме меѓународната правичност и правда“, соопшти Хуа преку платформата X.

Си беше домаќин на Асад во Хангжу, главен град на источната кинеска покраина Џеџанг, откако вчера пристигна во Кина во официјална посета на покана на кинескиот претседател - прва таква посета во речиси две децении.

Тој ќе присуствува и на церемонијата на отворање на 19. Азиски игри што се одржуваат во Хангжу.

Последен пат Асад ја посети Кина во 2004 година, за средба со тогашниот претседател Ху Џинтао.

Ова е негова прва посета на Кина по избувнувањето на сириската граѓанска војна пред повеќе од 12 години. За време на војната Сирија имаше релативно ниско ниво на меѓународен ангажман, но во последните години тоа почна да се менува.

Асад е придружуван од првата дама Асма ал Асад. Сириската делегација ќе го посети и главниот град Пекинг.