Кремљ: Русија се надева дека следната рунда мировни преговори со Украина ќе се одржат оваа недела

ИСТАНБУЛ (АА) - Кремљ денес соопшти дека Москва се надева дека следната рунда обновени мировни преговори меѓу Русија и Украина ќе се одржат оваа недела.

„Се надеваме дека преговорите ќе се одржат оваа недела. Штом ќе бидеме подготвени, ќе објавиме соопштение во врска со времето“, изјави портпаролот на Кремљ, Дмитриј Песков, за новинарите за време на брифингот за медиумите.

Велејќи дека руската страна не очекува „чудесни пробиви“ во преговорите, Песков тврдеше дека спогодбата во Украина е „толку сложена“ што постигнатите договори за размена на затвореници „веќе се резултат“.

Песков дополнително потсети дека Киев сè уште не ја укинал забраната од 2022 година, исклучувајќи ја можноста за преговори меѓу рускиот претседател Владимир Путин и украинскиот претседател Владимир Зеленски.

Тој, исто така, ја опиша темата на преговорите како „доста сложена“, истакнувајќи дека, покрај другите прашања, ќе бидат неопходни дискусии за нацрт-меморандумите разменети за време на втората рунда преговори што беа одржани минатиот месец.

„Воопшто не би ги проценил потенцијалните временски рамки. Тоа зависи од многу фактори и какви било прогнози сега би биле погрешни“, додаде Песков.

Песков ги даде овие изјави откако Зеленски во видеообраќање синоќа објави дека нова рунда мировни преговори меѓу Киев и Москва ќе се одржат во Турција в среда.

Досега, во Истанбул се одржаа две рунди обновени директни мировни преговори меѓу Русија и Украина - на 16 мај и 2 јуни.

Во последните разговори, двете страни се согласија да разменат дополнителни воени заробеници - давајќи приоритет на најмладите и најтешко повредените - и да ги вратат телата на 6.000 војници од секоја страна.