Макрон: „Израел не може да ги прошири своите операции во Либан без последици“

ЖЕНЕВА (АА) - Францускиот претседател Емануел Макрон денес изјави дека Израел не може да ги прошири своите операции во Либан без последици, повикувајќи ги сите страни да ја деескалираат ситуацијата, известува Анадолу.

„Израел не може, без последици, самостојно да ги прошири своите операции во Либан. Франција бара сите да ги почитуваат своите обврски долж Сината линија“, рече Макрон во обраќањето пред Генералното собрание на ОН.

Макрон истакна дека Франција ќе преземе чекори за да се погрижи дипломатскиот глас да се слушне, бидејќи е „неопходно“ да се заштитат цивилите и да се спречи ширењето на конфликтот во регионот.

„Не може да има војна во Либан. Затоа го повикуваме Израел да ја запре оваа ескалација во Либан и Хезболах да престане да лансира ракети кон Израел. Ги повикуваме сите оние кои им даваат средства да ги спречат да го прават тоа“, истакна Макрон.

Израел започна бранови смртоносни воздушни напади врз Либан од понеделник наутро во кои се убиени речиси 610 луѓе, а повеќе од 2.000 се ранети, објавија либанските здравствени власти.

Прекуграничните судири меѓу Израел и либанската група Хезболах започнаа по израелската офанзива на Појасот Газа, во која досега израелската армија уби околу 41.500 Палестинци, главно жени и деца.