Најмалку 44 загинати во ураганот Хелен во југоисточниот дел на САД

ИСТАНБУЛ (АА) - Ураганот Хелен во текот на вчерашниот ден ги погоди Флорида и југоисточниот дел на Соединетите Американски Држави (САД), предизвика голема девастација и однесе најмалку 44 животи, јавува Анадолу.

Меѓу жртвите се и тројца пожарникари, жена и нејзините едномесечни близнаци, како и една 89-годишна жена врз чиј дом паднало дрво.

Хелен беше најмоќната бура во историјата што го има погодено регионот Биг Бенд на Флорида, која се спушти на копното во текот на ноќта во четвртокот пред да продолжи кон север во сојузните држави Џорџија и Каролина.

Финансиските институции проценуваат дека штетите би можеле да достигнат милијарди долари.

Иако Хелен значително ослабе, синоптичарите предупредуваат дека во погодените области може да продолжат силните ветрови, поплавите и ризикот од торнада.