Mustafa Deveci
23 Октомври 2025•Ажурирај: 24 Октомври 2025
АНКАРА (АА) - Израелскиот премиер Бенјамин Нетанјаху ѝ наложил на својата коалициска влада да не го предлага законот за анексија на окупираниот Западен Брег до понатамошно известување, по критиките од американската администрација, известува Анадолу.
Локалните медиуми објавија дека Нетанјаху од Офир Кац, лидерот на неговата коалиција, побарал да спречи преземање какви било нови чекори во врска со законот за анексија на Западниот Брег во израелскиот парламент.
Се забележува дека наредбата на Нетанјаху за одложување на законот за анексија на Западниот Брег е издадена по критиките упатени од американската администрација.
Во меѓувреме, во писмено соопштение што го објави кабинетот на Нетанјаху, вчерашното гласање во Парламентот е опишано како „намерна политичка провокација од страна на опозицијата за сеење раздор за време на посетата на американскиот потпретседател Џ.Д. Венс на Израел“.
Се наведува дека гласањето, за кое е обвинета опозицијата, не било поддржано од партијата Ликуд на Нетанјаху и од партиите во коалициската влада.
Во соопштението се тврди и дека без поддршката на Ликуд, не би бил можен напредок на овој закон во Парламентот.
Предлог-законот, со кој ќе се гласаше за анексија на нелегалните еврејски населби изградени на палестинско земјиште на окупираниот Западен Брег, беше одобрен во израелскиот парламент вчера за време на прелиминарното гласање.
Во интервју за списанието „Тајм“, американскиот претседател Доналд Трамп предупреди дека доколку Израел го анектира окупираниот Западен Брег, ќе ја загуби целата поддршка од САД.
Потпретседателот на САД, Џ.Д. Венс, рече дека фактот што законот за анексија на окупираниот Западен Брег бил усвоен во парламентот преку прелиминарно гласање додека тој бил во Израел претставува навреда за него и дека тоа го смета за „глупаво“. Венс истакна дека политиката на администрацијата на американскиот претседател Доналд Трамп е против тоа и дека ќе продолжат така.
