ОАЕ пресретнале девет балистички ракети и 109 беспилотни летала за време на ескалацијата на тензиите

ИСТАНБУЛ (АА) - Воздушната одбрана на Обединетите Арапски Емирати пресретнала и уништила девет балистички ракети детектирани денес, а биле следени и 112 беспилотни летала, од кои повеќето биле пресретнати, соопшти Министерството за одбрана на земјата, јавува Анадолу.

„Системите за воздушна одбрана пресретнаа 109 беспилотни летала, додека три се урнаа на територијата на земјата“, се наведува во соопштението објавено на американската компанија за социјални медиуми Х.

Од почетокот на, како што се наведува „отворената иранска агресија“, системите за воздушна одбрана детектирале 205 балистички ракети, од кои 190 биле уништени.

„Тринаесет ракети паднале во морето, додека две паднале на територијата на земјата“, додава Министерството.

Според истото соопштение, властите детектирале и 1.184 ирански беспилотни летала, од кои 1.110 биле пресретнати, додека 74 се урнале во рамките на земјата. Системите за воздушна одбрана исто така детектирале и уништиле осум крстосувачки ракети.

Во нападите се убиени три лица – државјани на Пакистан, Непал и Бангладеш, додека 112 лица се здобиле со полесни повреди.

Министерството за одбрана соопшти дека останува во состојба на висока готовност за справување со какви било закани, нагласувајќи дека ќе одговори цврсто на дејствијата што ја загрозуваат безбедноста и стабилноста на земјата, како и нејзиниот суверенитет и национални интереси.

Иран, според извештаите, ги има за цел Израел и неколку земји од Заливот во кои се наоѓаат американски воени бази, како одмазда за тековните напади на САД и Израел во кои, како што тврдат иранските власти, биле убиени врховниот лидер на Иран, Али Хаменеи, и повеќе високи воени команданти.