Пентагон: САД се подготвени да ги исполнат барањата на НАТО во рамките на активирање на Силите за одговор

ВАШИНГТОН

Министерството за одбрана на САД изрази потполна подготвеност да ги исполни сите барања на Северноатлантскиот сојуз во рамките на активирање на Силите за одговор на НАТО, известува Агенција Анадолија (АА).

Силите за одговор на НАТО се активирани во одбранбени мерки како одговор на тековната воена операција на Русија во Украина.

Џон Кирби, портпаролот на Пентагон, изјави дека тоа е историскиот чекор со кој НАТО јасно порачува дека е подготвен да го брани секој сантиметар од територијата на НАТО.

„Тоа е големо нешто“, рече Кирби и додаде дека нема конкретни детали околу распоредувањето на единиците, термините и распоредот.

Врховниот командант на сојузничките сили на НАТО, генерал Тод Волтерс, ги активираше мултинационалните сили кои се состојат од копнени, воздухопловни, поморски и сили за специјални операции на сојузниците, што можат бргу да се распоредат за поддршка на НАТО-сојузниците.

Станува збор за прво активирање на НАТО-силите за одговор, што не значи дека какви било американски или НАТО-сили ќе влезат во Украина, која не е членка на Алијансата.

Претседателот на САД, Џо Бајден, беше јасен дека американските трупи се распоредуваат во источна Европа со цел да им помогнат на земјите членки на НАТО, но дека нема да се борат на тлото на Украина.