Разрешен Никола Минчев, претседателот на бугарскиот Парламент

СОФИЈА (АА) - Претседателот на бугарскиот Парламент, Никола Минчев, е разрешен со гласовите на пратениците од опозициските партии, пренесува Агенција Анадолија (АА).

Во 240-члениот Парламент на гласањето за смена на претседателската функција на Минчев учествуваа 239 пратеници.

Предлогот за разрешување на претседателот на Собранието е изгласан со 125 гласа „за“ и 113 „против“. Еден пратеник беше воздржан.

Минчев, кој вчера ја водеше седницата во Собранието на која се расправаше за политиките за Северна Македонија, беше критикуван од пратениците на опозициските партии кои побараа негова оставка.

Од друга страна, премиерот Кирил Петков, копретседател на партијата „Продолжуваме со промените“ (ПП) и лидер на коалициската Влада, поради гласањето ја одложи денешната посета на Азербејџан и дојде во Парламентот заедно со членовите на неговиот кабинет.

Петков во својата изјава рече дека партијата „Има таков народ“ (ИТН), на „популистичкиот шоумен“ Слави Трифонов, ја напушти владејачката коалиција на 8 јуни, со што е сменета распределбата на моќта меѓу власта и опозицијата.

Тој додаде дека неговата партија и Владата ќе продолжат со својата работа, и покрај губењето на најважната функција во земјата.

Откако го освои мнозинството гласови во Собранието, опозицијата вчера поднесе барање за недоверба на Владата, обвинувајќи ја Владата на премиерот Петков за неуспех.

Предлогот се очекува да биде изгласан за 7 дена.