Европејците со различни мислења за текот на војната во Украина

БРИСЕЛ (АА) - Јавноста во Европа во првиот период од руската војна против Украина сакаше Русија да биде поразена и казнета, но од неодамна изрази мислење дека војната треба да се прекине што е можно поскоро, јавува Агенција Анадолија (АА).

Европскиот совет за надворешни односи (ЕЦФР) со седиште во Брисел, тинк-тенк организација, во средината на минатиот месец направи анкета со повеќе од 8.000 жители на Финска, Шведска, Полска, Шпанија, Португалија, Германија, Франција, Романија, Италија и Велика Британија.

Според резултатите од истражувањето, европското јавно мислење во првите 100 дена од руската војна во Украина помагаше на нивните земји да заземат обединет став, но таа ситуација почна да се менува по 100 дена.

Од средината на мај, кога беше спроведено истражувањето, вниманието на јавноста од настаните на бојното поле се фокусира на прашања како што се крајот на конфликтот и неговите ефекти врз нивните земји и Европската Унија (ЕУ).

Истовремено, беше истакнато дека ова е период во кој Европејците станале свесни за глобалните економски и социјални последици од војната, како што се високата инфлација, енергетските и прехранбените кризи.

Според анкетата, 35 отсто од испитаниците сакале војната да заврши што е можно поскоро, 25 отсто истакнале дека најитна цел е да се казни Русија.

Оние испитаници кои одбиле да направат избор, сепак, во голема мера ги поддржувале акциите на ЕУ како одговор на руската војна во Украина.

Забележано е дека бројот на луѓе кои сакаат да заврши војната е поголем во сите земји, освен во Полска, која е домаќин на најмногу Украинци. Од испитаниците во Полска, 41 отсто се за поразување на Русија.

Педесет и два отсто од Италијанците и 49 отсто од Германците испитаници се за што поскоро постигнување на мир. Се наведува дека оваа група граѓани се против долга војна бидејќи се загрижени за цената што ќе ја платат од економските санкции против Русија и се исплашени од заканата од нуклеарна ескалација.

Истражувачите во извештајот забележуваат дека доколку санкциите на ЕУ не дадат резултати, 35-те проценти од луѓето кои сакаат да заврши војната, ќе пораснат на уште повеќе.