Betül Yılmaz
09 Декември 2025•Ажурирај: 11 Декември 2025
ИСТАНБУЛ (AA) – Израелската Армија е одговорна за речиси половина од смртните случаи на новинари низ светот во 2025 година, се наведува во извештај објавен денес, јавува Анадолу.
Според организацијата „Репортери без граници“ (RSF), меѓународна невладина организација со седиште во Париз која ги брани правата на новинарите, годинава е забележан значителен пораст на бројот на убиени медиумски работници.
Во извештајот се наведува дека 67 новинари биле убиени во последните 12 месеци, од кои најмалку 53 станале жртви на „криминални практики на вооружени групи и организиран криминал“.
„Речиси половина (43 %) од новинарите убиени во изминатата година загинале во Газа од Израелските вооружени сили“, се посочува во документот.
Од октомври 2023 година досега, израелската Армија убила околу 220 новинари, од кои 65 биле директна цел поради својата професија или биле во тек на работа.
Податоците на Канцеларијата за медиуми на Владата во Газа покажуваат дека најмалку 257 палестински новинари биле убиени од израелските сили од почетокот на војната.
Извештајот дополнително истакнува дека Израел се наоѓа на второто место во светот по притворање странски новинари, со 20 палестински новинари приведени во 2025 година, покрај уште 16 приведени во Газа и окупираниот Западен Брег во изминатите две години.
Израелската Армија уби повеќе од 70.000 луѓе, претежно жени и деца, и повреди над 171.000 други во Газа од октомври 2023 година.
Во извештајот се наведува и дека Мексико е „втората најопасна држава во светот за новинарите“, со девет убиени, додека Кина останува „најголемиот затвор за новинари“, каде што моментално се држат 121 медиумски работник.
Новинарите се соочуваат со поголем ризик во своите земји бидејќи сите убиени професионалци, освен двајца, биле убиени додека ги извршувале своите должности во своите матични земји, соопшти организацијата.
Во Судан, новинарите се изложени на сериозни злоупотреби поради продолжувањето на конфликтот, наведувајќи дека паравоените Сили за брза поддршка (RSF) убиле четворица новинари во 2025 година, вклучувајќи двајца киднапирани од групата.
Во Сирија, 37 новинари од 135 исчезнати и натаму се водат како исчезнати, поради киднапирања и затворања за време на владеењето на соборениот претседател Башар ал-Асад или заробувања од страна на ДЕАШ, стои во извештајот.
Асад, кој владееше речиси 25 години, избега во Русија на 8 декември 2024 година, со што заврши владеењето на партијата Баас започнато во 1963 година. Во јануари, Ал-Шараа, лидерот на силите кои го соборија режимот, беше назначен за привремен претседател.
