Русија: Американскиот план за изградба на системот за ракетна одбрана „Златна купола“ е суверено прашање

ИСТАНБУЛ (АА) - Русија денес го оцени планот на Вашингтон за изградба на систем за противракетна одбрана наречен „Златна купола“ како суверено прашање на Соединетите Американски Држави (САД), јавува Анадолу.

Американскиот претседател Доналд Трамп вчера објави дека ја избрал „архитектурата“ на долго најавуваниот систем за противракетна одбрана „Златна купола“ што, според негови процени, ќе чини 175 милијарди долари во текот на наредните три години.

„Ова е суверено прашање на САД“, изјави портпаролот на Кремљ, Дмитриј Песков, за новинарите во Москва.

„Доколку САД сметаат дека постои ракетна закана, тогаш, се разбира, тие развиваат системи за противракетна одбрана. Сите земји што имаат таков потенцијал го прават тоа“, додаде Песков.

Тој негираше дека Русија моментно го оценува проектот како закана за нуклеарната рамнотежа со САД.

„Потребно е да се разберат нијансите. Засега нема детали за овој проект“, нагласи Песков.

Од друга страна, Кина изрази загриженост, оценувајќи дека проектот го зголемува ризикот од милитаризација на вселената и поттикнува трка во вооружување.

Во меѓувреме, портпаролот на Кремљ изјави дека Москва и Вашингтон контактираат за потенцијална размена на затвореници во која ќе бидат вклучени по деветмина од двете страни, додавајќи дека сè уште не е одреден датумот на размена.

Откако американскиот и рускиот претседател разговараа повеќе од два часа во понеделникот, рускиот претседателски советник Јуриј Ушаков потврди дека темата за размена на затвореници била една од главните точки на дискусија.