Седум цивили се убиени во израелски напад на Хан Јунис

ГАЗА (АА) - Најмалку седум цивили се убиени, а 22 се ранети вчера во израелското гранатирање на Хан Јунис, во јужниот дел на Појасот Газа, јавува Анадолу.

Како што соопшти Министерството за здравство, цел на нападот била група цивили во подрачјето на Хан Јунис.

Израелската армија сѐ уште не се огласи во врска со нападот.

Повеќе од 37.500 Палестинци се убиени во Појасот Газа во неселективно бомбардирање и гранатирање на цивилни населби, училишта, верски објекти и болници од 7 октомври минатата година, од кои повеќето се жени и деца, а околу 86.000 се ранети, објавија локалните здравствени власти на палестинската енклава.

Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од еден милион раселени Палестинци побараа засолниште.

И покрај тоа, израелските напади врз Појасот Газа продолжуваат со несмален интензитет, а испораката на хуманитарна помош не е доволна за решавање на хуманитарната катастрофа.