Сирија: Загинаа најмалку 10 лица, а повредени се 32 во руските воздушни напади врз Идлиб

ИДЛИБ (АА) - Најмалку 10 лица загинаа, а 32 се повредени во воздушните напади извршени од руските воени авиони врз провинцијата Идлиб во Северозападна Сирија, известува Анадолу.

Според информациите добиени од опсерваторијата на опозициските авиони, вчера околу 17 часот по локално време три руски воени авиони полетале од воздухопловната база Хмеимим во Латакија и извршиле четири воздушни напади врз Идлиб.

Според информациите добиени од Сириската цивилна одбрана (Бели шлемови), 10 лица загинале во воздушните напади врз селото Ајншиб, а повредени се најмалку 32.

Последните четири дена Русија изврши воздушни напади врз 27 точки во Идлиб.

- Ситуацијата во Идлиб

На состанокот во Астана во 2017 година Туркије, Русија и Иран одлучија да формираат четири „зони за деескалација“ во областа што не е под контрола на сириската администрација.

Администрацијата на Дамаск, Русија и терористите поддржани од Иран продолжија со нападите, зазедоа три од четирите зони и се упатија кон Идлиб.

Иако Туркије постигна дополнителен договор со Русија за зајакнување на прекинот на огнот во септември 2018 година, нападите повторно се интензивираа во мај 2019 година. По новиот договор постигнат меѓу Туркије и Русија на 5 март 2020 година прекинот на огнот се одржува во голема мера.

Приближно два милиона цивили што избегаа од нападите во периодот од 2017 до 2020 година беа принудени да мигрираат во региони блиску до турската граница.