Трамп: Израел и Хамас ја потпишаа првата фаза од договорот за Газа предложен од САД

ВАШИНГТОН (АА) - Американскиот претседател Доналд Трамп денес објави дека Израел и палестинската група Хамас ја потпишале првата фаза од договорот за Газа предложен од Соединетите Американски Држави (САД), пренесува Анадолу.

„Многу сум горд што можам да објавам дека Израел и Хамас ја потпишаа првата фаза од нашиот мировен план“, вели Трамп.

„Ова значи дека сите заложници ќе бидат ослободени многу наскоро, а Израел ќе ги повлече своите трупи на договорена линија како прв чекор кон силен, траен и вечен мир“, рече Трамп на својата платформа „Трут соушал“.

Сите страни ќе бидат „третирани фер“, додаде тој.

Претседателот го опиша моментот како „голем ден“ за арапскиот и муслиманскиот свет, Израел, околните земји и САД.

Трамп им се заблагодари на сите посредници, вклучувајќи ја и Турција, кои работеле со нив за да се случи овој историски и невиден настан.

„Блажени се миротворците“, рече тој.

Претходно, Трамп изјави дека можеби ќе отпатува во Египет овој викенд, бидејќи преговорите за прекин на огнот во Газа покажуваат знаци на напредок.

„Можеби ќе одам таму некаде кон крајот на неделата, можеби в недела“, изјави тој за новинарите, истакнувајќи дека има „многу добри шанси“ за напредок во преговорите.

„Тукушто добив писмо од државниот секретар (Марко Рубио) во кое се вели дека сме многу блиску до договор на Блискиот Исток и дека ќе имаат потреба од мене доста брзо“, рече тој.

Индиректните преговори меѓу Израел и Хамас се во тек во Египет од понеделникот, за да се разговара за планот на Трамп за прекин на конфликтот.

Според државниот канал „Ал-Кахера њуз“, покрај специјалниот претставник на САД, Стив Виткоф, и зетот на Трамп, Џаред Кушнер, на списокот на учесници се и шефот на Турската разузнавачка служба, Ибрахим Калин, катарскиот премиер, шеикот Мухамед бин Абдулрахман ал Тани, шефот на Египетската разузнавачка служба, Хасан Рашад, и израелскиот министер за стратешки прашања, Рон Дермер.

На 29 септември Трамп претстави план од 20 точки, кој вклучува ослободување на сите израелски заробеници во замена за палестинските затвореници, прекин на огнот, разоружување на палестинската група Хамас и обнова на Газа.

Од октомври 2023 година израелската војска уби речиси 67.200 Палестинци во Газа, повеќето жени и деца.

Немилосрдното бомбардирање ја направи енклавата несоодветна за живеење и доведе до масовно раселување, глад и ширење на болести.