Трамп најави соработка со Иран по „промената на режимот“

Американскиот претседател Доналд Трамп денес изјави дека Соединетите Американски Држави (САД) ќе соработуваат со Иран по она што тој го опиша како „многу продуктивна промена на режимот“, пренесува Анадолу.

Во објава на својата социјална мрежа „Трут сошал“, Трамп напиша: „САД тесно ќе соработуваат со Иран, за кој утврдивме дека помина низ она што ќе биде многу продуктивна промена на режимот!“

„Нема да има збогатување на ураниум, а САД, работејќи со Иран, ќе ја откопаат и отстранат целата длабоко закопана нуклеарна ’прашина‘ (од бомбардерите Б-2). Таа сега е, и беше, под многу прецизен сателитски надзор! Ништо не е допрено од датумот на нападот“, додаде тој.

Трамп, исто така, укажа на напредок во економските мерки, велејќи: „Разговараме и ќе разговараме со Иран за олеснување на царините и санкциите. Многу од 15-те точки веќе се договорени“.

Американскиот претседател синоќа објави дека се согласил „да ги прекине бомбардирањата и нападите врз Иран во период од две недели“.

Тој ја соопшти својата одлука помалку од два часа пред крајниот рок што му го постави на Иран за повторно отворање на Ормускиот Теснец и прифаќање на договорот, предупредувајќи дека во спротивно земјата ќе се соочи со она што тој го опиша како уништување на „цела една цивилизација“.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.