Трамп ја критикуваше СЗО: „Тие ја минимизираат заканата од Ковид-19“

ВАШИНГТОН

Американскиот претседател, Доналд Трамп, ја обвини Светската здравствена организација (СЗ0) за минимизирање на заканата од Ковид-19, велејќи дека тие погрешно го сфатиле ширењето на пандемијата, јавува Агенција Анадолија (АА).

„СЗО сфатија погрешно. Грешат на многу начини. Тие исто така силно ја минимизираа заканата. Не е добро тоа“, изјави Трамп за новинарите во Белата куќа.

Тој изјави дека САД секоја година на најголемата здравствена организација ѝ плаќаат стотици милиони долари и дека во 2019 година тие платиле 452 милиони долари, додека Кина платила 42 милиони долари.

„Тоа не е фер. Мислам дека тие мора да постават приоритети во таа организација и нивните приоритети се секоја земја да биде третирана правилно. А тоа не изгледа така, нели?“, изјави Трамп.

Тој исто така рече дека САД ќе ја испитаат ситуацијата и ќе одлучат за нивната идна вклученост во СЗО.

Еден ден претходно, Трамп ја критикуваше организацијата дека води политика концентрирана на Кина и дека го критикувале за суспендирање на летовите од Кина.

САД се најголем придонесувач во буџетот на СЗО.

Генералниот секретар на ОН, Антонио Гутереш, пак, ја бранеше организацијата на ОН и рече дека таа се бори во првите редови на војната против коронавирусите.

Гутереш рече дека е јасно оти СЗО треба да биде поддржана затоа што тоа е клучен фактор во глобалната борба против пандемијата.

Генералниот директор на СЗО, Тедрос Аданом Гебрејесус, ги отфрли критиките на Трамп и повика на соработка меѓу САД и Кина.