Necva Taştan Sevinç
29 Јули 2025•Ажурирај: 30 Јули 2025
ИСТАНБУЛ (АА) – Франција во наредните денови ќе започне со пуштање хуманитарна помош од воздух над Појасот Газа, со цел да ја ублажи сè позагрижувачката хуманитарна криза, јави француската телевизија „БФМ ТВ“ денес, јавува Анадолу.
Одлуката доаѓа во момент кога опколената енклава се соочува со она што Интегрираната класификација на фазите за безбедност на храната (ИПЦ) – организација поддржана од ОН – го опиша како „најлошото можно сценарио на глад“.
Француските дипломатски извори посочуваат дека ќе се преземат „најголеми мерки на претпазливост за безбедноста на населението за време на овие операции“, алудирајќи можеби на повеќе од 1.000 Палестинци кои беа убиени од израелските сили додека се обидувале да дојдат до храна преку контроверзниот план за помош поддржан од САД и Израел.
Властите во Париз, исто така, ја разгледуваат можноста за доставување помош по копно, со цел побрза и пообемна дистрибуција. Сепак, истите извори нагласуваат дека испуштањето помош од воздух не е замена за поголем хуманитарен пристап.
„Испуштањето хуманитарна помош од воздух не е наменето да го замени потребното значително зголемување на количината на помош, што би барало Израел веднаш да ги отвори копнените премини“, изјави еден од официјалните претставници.
Франција, заедно со голем број други земји, повеќепати повика на прекин на огнот и побара од Израел да ги отвори премините за непречено доставување хуманитарна помош.
- Израел спроведува целосна блокада на Појасот Газа
Израел применува блокада на Газа веќе 18 години, а од 2 март ги затвори сите премини, со што се влошија хуманитарните услови во енклавата.
Според Министерството за здравство на Газа, најмалку 147 лица починале од глад од октомври 2023 година, меѓу кои 88 деца.
И покрај меѓународните повици за прекин на огнот, израелската Армија води интензивна офанзива во Газа од 7 октомври 2023 година, при што се убиени над 60.000 Палестинци, најголем дел од нив жени и деца.
Вчера, израелските групи за човекови права „Б’Тселем“ и „Лекари за човекови права-Израел“ го обвинија Израел за извршување геноцид во Газа, наведувајќи го систематското уништување на палестинското општество и намерното уништување на здравствениот систем на територијата.
