Хамас: Отворени сме за секој предлог за траен прекин на огнот во Газа

БЕЈРУТ (АА) - Осама Хамдан, главниот претставник на палестинската група на отпорот Хамас во Либан и член на нејзиното политичко биро, рече дека се отворени за секој предлог за краен и целосен прекин на огнот во Појасот Газа, но се противат на администрациите наметнати од Израел или Соединетите Американски Држави (САД), јавува Анадолу.

За време на прес-конференцијата во либанскиот главен град Бејрут, Хамдан даде информации за хуманитарната ситуација во Газа, за тоа дека Израел ги зел телата на 80 Палестинци и за политичките напори што се спроведуваат.

Истакнувајќи ги бројните злосторства на Израел за време на неговите напади, што траат во Газа веќе 83 дена, тој рече дека „израелските сили ги украле телата на 80 луѓе од различни делови на Газа“.

„Тие ги отворија гробниците, ги извадија телата и им ги украдоа органите. Меѓународниот комитет на Црвениот крст ги предаде овие тела како ништо да не се случило, без да даде никакви изјави за идентитетот на овие тела“, рече тој.

„Бараме од Комитетот на Црвениот крст да објасни како ги примиле овие трупови без никакви информации за тоа како починале овие лица и за нивниот идентитет“, додаде тој.

Хамдан нагласи дека не влегува доволно помош во Газа, поради што луѓето умираат од глад и жед, особено жените, децата, повредените и болните.

Тој повика на итна акција од арапскиот и исламскиот свет и меѓународната заедница за да се обезбеди испорака на храна, особено во северниот дел на Газа.

- Заробениците држени од Хамас и „поразите“ на Израел -

Говорејќи за нападите на Израел во Газа, Хамдан рече дека израелскиот премиер Бенјамин Нетанјаху, министерот Бени Ганц и министерот за одбрана Јоав Галант „тврдат дека за три месеци поминале од една во друга фаза и се залажуваат себеси и народот со лажна победа. Во реалноста се соочуваат со еден по друг пораз.“

Хамдан зборуваше и за заробениците што ги држи Хамас „Нетанјаху мислеше дека може да ги врати заробениците преку воен притисок.“

„Ве предизвикувам да покажете еден заробеник вратен од Нетанјаху без да се поклони на условите на отпорот. Велам јасно можете да ги вратите вашите заробеници само преку воен притисок како безживотни тела или воопшто да не ги вратите.“

- „Нашиот народ сака целосен прекин на огнот“ -

Во однос на политичките напори, Хамдан истакна дека Хамас е отворен за секој предлог за конечен и целосен прекин на огнот во Газа.

„Нашиот народ не сака фрагментиран или привремен, туку целосен прекин на огнот“, рече тој.

Хамдан исто така нагласи дека прашањето за раководењето на палестинскиот народ ги засега Палестинците и дека народот сака национална администрација посветена на отпорот и посветена на постигнување на националните цели, а не влада донесена од израелските или американските тенкови.

Египет подготви „прелиминарен предлог“ за прекин на огнот во Појасот Газа на 27 декември.

Диа Рашван, претседател на Египетскиот државен информативен сервис, вчера рече дека сè уште не добиле официјален одговор од страните за предлогот.