Хуманитарните организации им поделија топол оброк на Палестинците во Газа, каде што се продлабочува кризата со глад

СКОПЈЕ (АА) – Хуманитарните организации им поделија топол оброк на раселените Палестинци во Газа кои се соочуваат со сериозен глад поради тековната блокада на Израел, јавува Анадолу.

Во подрачјето на Ал-Маваси во Кан Јунис, Јужна Газа, хуманитарните организации им обезбедија храна на семејствата што се засолниле во шаторите поради хуманитарната криза.

Долги редици се формираа пред пунктовите, каде што огромен број Палестинци, меѓу кои и деца, трпеливо чекаа за порција храна.

Од 2 март Израел ги затвори граничните премини во Газа за внесување храна, медицински материјали и хуманитарна помош, предизвикувајќи продлабочување на хуманитарната катастрофа, според извештаите на владините тела, групите за човекови права и меѓународните агенции.

Неодамна УНРВА предупреди дека Газа е на раб на „екстремен глад“ поради континуираната блокада.

Израелската армија ги продолжи нападите врз Газа на 18 март, кршејќи го договорот за прекин на огнот и размена на затвореници што беше на сила од 19 јануари.

Од октомври 2023 година досега Израел во енклавата уби над 51.400 Палестинци, повеќето жени и деца.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со тужба за геноцид пред Меѓународниот суд на правдата за неговите постапки во енклавата.