Хусите тврдат дека уапсиле агенти на Мосад и ЦИА во Јемен

САНА (АА) - Јеменските Хуси денес соопштија дека уапсиле неколку шпиони во Јемен што наводно работеле за израелската разузнавачка агенција Мосад и американската Централна разузнавачка агенција (ЦИА), пренесува Анадолу.

„Последниве денови безбедносните агенции уапсија (неодреден) број шпиони регрутирани од бараниот (човекот) Хамид Хусеин Фајед Маџали“, објави ТВ-каналот Ал-Масира, поврзан со Хусите, цитирајќи соопштение објавено од групата.

Во соопштението, во кое не се споменува националноста на уапсените наводни шпиони, се вели дека Мосад и ЦИА им дале неколку задачи на овие шпиони, вклучително и „следење и собирање информации за експерти, лаборатории, платформи за лансирање, ракетни системи и дронови што го таргетираат ционистичкиот непријател (Израел), како и локации на поморски сили, кампови и складишта на оружје“.

Дополнително, задачите вклучувале „следење и собирање информации за тоа каде се наоѓа нивниот лидер Абдул-Малик ал-Хуси, заедно со други политички, воени и безбедносни лидери“.

Наводно, на шпионите им било наложено да обезбедуваат координати за овие локации на Хамид Маџали, кој потоа требало да ѝ ги пренесе на Мосад за да го олесни таргетирањето од страна на американските, израелските и британските воздушни сили.

Овие шпиони, исто така, имале задача да „се обидат да се инфилтрираат, регрутираат и да вметнат агенти во вооружените сили и безбедносниот апарат“, според јеменското движење на Хусите.

Хусите вршат напади врз израелски товарни бродови или бродови поврзани со Тел Авив во Црвеното Море со проектили и дронови во знак на поддршка на Појасот Газа, каде што над 45.300 луѓе се убиени во геноцидната војна на Израел од 7 октомври 2023 година.