Шефот на американското одбранбено разузнавање разрешен по проценката за нападот во Иран

ИСТАНБУЛ (АА) - Директорот на Агенцијата за одбранбено разузнавање на САД (ДИА), генерал-потполковник Џефри Крус, е отстранет од својата функција, објави Си-би-ес, пренесува Анадолу.

Висок претставник од одбраната го потврди разрешувањето на Крус, истакнувајќи само дека: „Генерал-потполковник Крус повеќе нема да биде директор на ДИА“.

Кристин Бордин, заменик-директор на агенцијата, е назначена за вршител на должноста директор.

ДИА е една од главните воени разузнавачки служби на Соединетите Американски Држави, која обезбедува анализи на Пентагон и Белата куќа. Агенцијата беше одговорна за прелиминарната проценка на американските воздушни напади врз нуклеарните објекти на Иран, кампања што означи голема ескалација на тензиите меѓу Вашингтон и Техеран уште во јуни.

Според Си-би-ес, проценката на ДИА заклучи дека нападите ја вратиле нуклеарната програма на Иран само за неколку месеци и дека некои залихи на збогатен ураниум биле преместени пред нападот.

Таа проценка беше во спротивност со телевизиското обраќање на претседателот Доналд Трамп во кое тој ги прогласи нуклеарните капацитети на Иран за „комплетно и целосно уништени“, а нуклеарната програма уназадена за „децении“.

Очигледната контрадикција предизвика гнев во администрацијата, објави Си-би-ес, и можно е да одиграла улога во разрешувањето на Крус.

Според извештајот, раководителите на Комисијата за разузнавање во Конгресот биле информирани за разрешувањето, но не им била дадена причина.