Во 66 града во Туркије уапсени 459 лица за поврзаност со терористичката организација ФЕТО

АНКАРА (АА) - Безбедносните сили на Туркије приведоа најмалку 459 лица осомничени за поврзаност со терористичката организација ФЕТО, одговорна за обидот за пуч во земјата во јули 2016 година, потврди турскиот министер за внатрешни работи Али Јерликаја, јавува Анадолу.

Јерликаја на социјалните мрежи објави дека турските полициски екипи спроведуваат операција „Стегач-30“ во 66 турски града, меѓу кои Анкара, Истанбул и Измир.

Наведувајќи дека при претресот се приведени 459 лица, Јерликаја напомена дека е откриено оти осомничените биле сместени во ќелии наречени „куќи за отсуство“ и им припаѓале на финансиските, студентските, полициските, воените и судските тајни структури на организацијата ФЕТО.

Јерликаја наведе оти е утврдено и дека осомничените вршеле пропаганда за организацијата преку своите платформи на социјалните медиуми, комуницирале со одговорните членови на организацијата преку телефонски говорници и ја користеле програмата за крипто комуникација на организацијата „Бајлок“.

„Ни по смртта на водачот на ФЕТО (Фетула Ѓулен) нема простор за олабавување во нашата борба против оваа предавничка, терористичка организација. Ќе се бориме додека не ја елиминираме оваа предавничка структура што се обидува да изврши државен удар против нашата национална волја. Им честитам на нашите државни обвинителства што ги координираа акциите и на нашите херојски полицајци што ги изведоа акциите“, порача Јерликаја.

Терористичката организација ФЕТО е одговорна за крвавиот обид за пуч во Туркије ноќта на 15 јули 2016 година, а станува збор за терористичка организација што ја предводеше Фетула Ѓулен, кој со години живееше во САД и чија екстрадиција Туркије претходно официјално ја побара од САД. Ѓулен почина минатиот месец.

Припадниците на оваа терористичка организација со години напредуваа во службата со местење на испитите, со што се инфилтрираа во институциите на државата. Потоа, прво во декември 2013 година, приврзаниците на ФЕТО во судството на Туркије се обидоа со монтиран судски процес за наводна корупција да процесуираат голем број високи функционери.

Неколку години подоцна следуваше крвав обид за државен удар на терористите на ФЕТО, односно обид за пуч извршен од офицери што ФЕТО ги инфилтрира во турската војска.

Истрагата за терористичката организација ФЕТО покажа дека станува збор за глобална мрежа што претставува опасност не само за Туркије туку и за секоја друга земја каде што е активна. Турските власти во повеќе наврати укажуваа на ова. За време на обидот за државен удар во Туркије загинаа 253 лица, а над 2.730 луѓе беа повредени.