Sefa Şahin
23 Август 2023•Ажурирај: 24 Август 2023
АНКАРА (АА) - Турскиот претседател Реџеп Таип Ердоган уште еднаш потсети дека Туркије не ја признава анексијата на Крим, јавува Анадолу.
„Ние го застапуваме ставот во корист на територијалниот интегритет и суверенитет на Украина“, рече Ердоган во видеопораката по повод 3. Самит на лидерите на Кримската платформа.
На почетокот на обраќањето Ердоган ги поздрави претседателот на Украина, Владимир Зеленски, другите шефови на држави и влади, националниот лидер на кримските Татари, Мустафа Киримоглу, и останатите учесници на самитот.
Турскиот претседател го честита Денот на знамето и Денот на независноста на Украина.
„Туркије, која не ја признава анексијата на Крим, од првиот ден одлучно го застапува ставот дека таквата постапка е незаконска. Исто така остануваме на ставот во корист на територијалниот интегритет и суверенитет на Украина. Истакнуваме на секоја платформа, особено во Обединетите нации, дека Крим е дел од Украина. Осигурувањето безбедност и благосостојба на кримските Татари, еден од автохтоните народи на Крим, е еден од нашите приоритети“, рече Ердоган и додаде:
„Како што секогаш велам, во војна нема победници, а во мир нема губитници. Затоа, ние се залагаме за ставот дека војната што трае речиси две години треба да заврши со праведен и траен мир. Во овој процес вложуваме големи напори да ги задржиме отворени комуникациските канали за да престане крвопролевањето и страните барем да се подготват за преговарачката маса“, рече Ердоган.
Тој нагласи дека продолжуваат со напорите за заживување на црноморската иницијатива, додавајќи дека во овој процес треба да се избегне секој чекор што ќе ги зголеми тензиите и ќе му наштети на мирот во Црното Море.
„Ние сме одлучни неуморно да продолжиме со нашите напори за посредување во согласност со воспоставувањето на мирот. Крајот на војната и воспоставувањето мир и стабилност во регионот на Црното Море ќе обезбеди олеснување не само за регионот, туку и за целиот свет. Ја повторувам нашата поддршка на територијалниот интегритет на Украина, вклучувајќи го и Крим, и се надевам дека нашиот регион што поскоро ќе ја врати атмосферата на мир“, рече Ердоган.
Киев, главниот град на Украина, денеска е домаќин на 3. Самит на Кримската платформа, кој се одржува во хибриден формат.
