Ердоган за барањето на Шведска и Финска за прием во НАТО: „Не сакаме само зборови, туку резултати“

АНКАРА (АА) - Анкара очекува да види дела наместо празни зборови од Шведска и Финска за терористичките организации, рече турскиот претседател пред да замине на самитот на НАТО во Мадрид денес, јавува Агенција Анадолија (АА).

Велејќи дека членството во НАТО доаѓа со одговорности, Ердоган за новинарите изјави: „Доколку Шведска и Финска сакаат да станат членки на НАТО, тие треба да ги земат предвид безбедносните грижи на Туркије, членка на Алијансата веќе 70 години.“

Шведска, заедно со Финска, официјално поднесоа барање за влез во НАТО минатиот месец, одлука поттикната од руската војна против Украина, што започна на 24 февруари.

Но, Туркије, долгогодишна членка на Алијансата, изрази приговори за кандидатурите за членство, критикувајќи ги земјите дека ги толерираат, па дури и ги поддржуваат терористичките организации.

„Ќе одржиме четиристрана средба (за кандидатурите за членство на Шведска и Финска) и ќе видиме до која точка стигнале. Не сакаме само зборови, туку резултати“, рече Ердоган.

Тој додаде дека Анкара очекува Стокхолм и Хелсинки да го спречат слободното дејствување на терористичките организации ПКК и ЈПГ/ПЈД и сите други гранки во нивните земји.

Ердоган рече дека демонстрациите на поддржувачите на терористичката организација ПКК не се ограничени само на Шведска, туку се одржуваат и во земји како Германија, Холандија и Грција.

„Туркије беше нападната од такви терористички организации и ниту една изјава не беше дадена од тие земји“, додаде Ердоган.

Велејќи дека самитот во Мадрид се одржува во критично време, Ердоган рече дека треба да се реши руско-украинската војна и нејзините последици врз НАТО, како и капацитетот за одвраќање на Алијансата и заканите што се појавуваат на јужната хемисфера.

„Очекуваме од нашите сојузници да не прават дискриминација меѓу членките на НАТО и дека закана против еден треба да се толкува како закана против сите“, рече Ердоган.

На средбата со лидерите во рамките на самитот, Ердоган изјави: „Имавме разговор со господин (американскиот претседател Џо) Бајден утринава. Тој изјави дека сака повторно да се состанеме вечерва или утре. Ние му одговоривме дека е можна повторна средба.“

Додавајќи дека преговорите со САД се во тек за договорот за борбени авиони Ф-16, Ердоган рече: „За жал, тактиката на застој на тие преговори сè уште е присутна.“

Критикувајќи ги САД дека обезбедуваат пушки и муниција за ПКК и нејзините ограноци, Ердоган рече дека тоа оружје се користи против Туркије и дека тој ќе го подигне ова прашање на самитот.

Ердоган, исто така, ја отфрли евентуалната средба со грчкиот премиер Киријакос Мицотакис, велејќи дека нема средба со Грција додека „не се вразумат“.

Минатиот месец, Ердоган го критикуваше Мицотакис за неговите коментари за Туркије за време на официјалната посета на САД, велејќи дека со грчкиот премиер не вреди повеќе да се занимава.

Туркије во последниве месеци, исто така, ги засили критиките за Грција што стационира војници на островите во источниот дел на Егејското Море, во близина на турскиот брег кои во многу случаи се видливи од брегот.

Овие острови требаше да бидат демилитаризирани според Договорот од Лозана од 1923 година и Договорот од Париз од 1947 година, така што какви било војници или оружје на островите се строго забранети.