АНКАРА (АА) - Претседателот на Република Туркије, Реџеп Таип Ердоган, изјави дека Разузнавачката служба на Туркије (МИТ) со успешна операција во Сирија го неутрализирала лидерот на терористите на ДЕАШ, Абу ал-Хусеин ал-Кураши, известува Анадолу.
Ердоган гостуваше во заедничката програма во живо што ја емитуваа повеќе турски телевизиски канали и во таа прилика зборуваше за борбата против тероризмот.
Тој рече дека со јавноста сака да сподели една вест која потврдува дека неговата земја е одлучна во борбата против тероризмот.
„Нашата Национална разузнавачка служба (МИТ) веќе подолго време го следеше т.н. лидер на ДЕАШ, со кодно име Абу ал-Хусеин ал-Кураши. Ова лице вчера е неутрализирано со операција што ја изведе Националната разузнавачка служба во Сирија“, рече Ердоган.
Турскиот претседател подвлече дека неговата земја ќе ја продолжи борбата против секој вид тероризам, без правење какви било разлики.
„Кога САД ги неутрализираат шефовите на ДЕАШ од овој вид, шефовите на терористичките организации, тие го дигаат светот на нозе. Еве, сега ние неутрализиравме не еден, не два, не три, туку мноштво терористи поврзани со ДЕАШ. Неутрализиравме и мноштво терористи поврзани со ПКК“, додаде Ердоган.
