ИСТАНБУЛ (АА) – Истакнати муслимански научници денес ја нагласија итната обврска за обезбедување помош на Палестинците во Газа, на вториот ден од меѓународната конференција на Островот за демократијата и слободата во Истанбул, јавува Анадолу.
Собирот, насловен како „Исламска и хуманитарна одговорност: Газа“, е организиран од Меѓународната унија на муслимански научници (IUMS) и Фондацијата за исламски научници на Турција. На него учествуваат повеќе од 150 научници од над 50 земји со цел да разговараат за војната на Израел во Газа и одговорот на поширокиот исламски свет.
Денот започна со протоколарна сесија на која имаа говори високи претставници, меѓу кои претседателот на IUMS, шеикот Али Мухјидин ал-Карадаги, Али Ербаш, шеф на Претседателството за верски прашања на Турција (Дијанет) и генералниот секретар на IUMS, шеикот Али Мухамед ал-Салаби.
Шеикот Абдул Вахаб Ајкинџи, претседател на Здружението Уммeт, ја отвори сесијата во име на организацискиот одбор, додека говори одржаа ирачки и турски научници, вклучително и шеикот Ахмед Хасан Ал-Таха од Ирачкиот совет за фикх и професорот Насрула Хаџимуфтуоглу, претседател на Фондацијата на исламски научници на Турција.
Првата работилница се фокусираше на „обврската за помош на Газа“, каде што шефовите на делегациите презентираа препораки.
Програмата вклучува брифинг за медиумите за најновите случувања во Газа, обраќања на гостите, а ќе заврши со јавна декларација и протест во знак на солидарност со Палестинците.
Осумдневниот настан, кој започна во вчера со молитва во џамијата Ејуп Султан во Истанбул, ќе продолжи до 29 август.
Предвидено е затворањето на конференцијата да се одржи во Големата џамија Аја Софија со издавање на „Истанбулската декларација“, документ за кој организаторите велат дека ќе бидат наведени „конкретните чекори за политичка, хуманитарна и правна акција“ за поддршка на палестинската кауза.
- „Благодарни сме на оние кои не молчат“ -
Во разговор за Анадолу на маргините на конференцијата, Абдул Вахед Нијазов, претседател на Европскиот муслимански форум, го пофали лидерството на Турција во организирањето на собирот.
Нијазов рече дека многу муслимански организации молчат за Газа, но нагласи дека Дијанетот на Турција и Меѓународната унија на муслимански научници „не молчеа, туку ги собраа своите колеги, муслимански духовни лидери и се обидуваат да допрат до умовите на општеството, зборувајќи за ужасите што ги доживуваат нашите браќа и сестри во Газа денес“.
- Муслиманите во Европа „покажаа одговорност“ -
На прашањето за улогата на муслиманите во Европа, Нијазов рече дека заедниците во дијаспората биле поактивни од многу влади со муслиманско мнозинство.
„Горди сме што муслиманите од Европа ја покажаа својата одговорност и организација во текот на изминатите 23 месеци. За разлика од поголемиот дел од муслиманскиот свет, особено арапските земји, муслиманите од Европа секој викенд ги исполнуваат најголемите плоштади и улици во Европа, кревајќи го својот глас во одбрана на Газа и Палестина“, рече тој.
Додаде дека муслиманските заедници во Европа, Америка и Канада покажале „зрелост“, на кои им се придружиле луѓе од други вери, вклучително и христијани и Евреи, во осудата на геноцидот и „ционистичката суровост и злосторства“.
„Само нашата организација, пред минатата година, одржа вакви акции во 17 европски земји, масовни акции во поддршка на Палестина, Газа и муслиманските светилишта“, рече Нијазов, оддавајќи почит на „ентузијазмот и импулсот на верниците“ низ цела Европа за одржување на овие демонстрации.
- „Европските институции молчат“ -
Осврнувајќи се на иницијативите на Европскиот муслимански форум, Нијазов посочи на растечката поддршка на јавноста за Палестина низ цела Европа, но ги обвини политичките институции дека заостануваат.
„Поголемиот дел од Европејците денес не го прифаќаат крвавиот геноцид и злосторствата на ционистите и се спротивставуваат на тоа. Гледаме како се менува ставот на Велика Британија, Франција, Холандија. Дури и почнува да се менува во Германија“, рече тој.
Сепак, тој го критикуваше раководството на ЕУ за неактивност.
„Што се однесува до европските институции, за жал, тие зазедоа став на молчење и рамнодушност. Тие повеќе не можат да го негираат геноцидот во Газа, но се обидуваат да останат во молк. Раководството на ЕУ предводено од г-ѓа Фон дер Лајен има особено опуштен став“, рече Нијазов, додавајќи дека историјата ќе ги оцени таквите лидери како „соучесници во крвави злосторства“.
Нијазов, исто така, ја истакна поддршката од црковните институции, меѓу кои и Ватикан, и посочи на изјавите на покојниот папа Франциск за Палестина.
„Верникот не може, а да не го забележи убиството на стотици илјади жени и деца секоја недела“, рече тој, нагласувајќи дека мобилизацијата на граѓаните останува најсилната сила за промени.
„Да, постојат корумпирани влади, лидери кои се плашат од нешто, страшните сили на САД или израелското лоби“, рече тој.
„Но, кога луѓето излегуваат на улица, на плоштад, тие успеваат, чекор по чекор, да ја променат ситуацијата.“
