Туркије ја одбележува 2-годишнината од земјотресите на 6 февруари

ИСТАНБУЛ (АА) - Туркије ја одбележа втората годишнина од двата разорни земјотреса што ги погодија јужните делови на земјата на 6 февруари 2023 година, во кои загинаа 53.537 луѓе, а повеќе од 107.000 беа повредени, јавува Анадолу.

Жителите на градовите погодени од земјотресите се собраа на градските плоштади во 4:17 часот наутро, време кога се случи првиот потрес, за да оддадат почит со едноминутно молчење.

Во неколку градови беа организирани тивки маршеви за да им се оддаде почит на жртвите во катастрофата.

Во Пазарџик, епицентар на земјотресот во Кахраманмараш, жителите се собраа пред Саат-кулата, која сè уште е застаната на 4:17 ч.

Во Хатај, една од најтешко погодените провинции, претставници на трите абрахамски религии одржаа молитви како дел од комеморативната церемонија. Црвени каранфили беа фрлени во реката Оронтес, позната како река Аси во Туркије, во спомен на загинатите.

На 6 февруари 2023 година два земјотреса со јачина од 7,7 и 7,6 степени погодија 11 турски области – Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатија, Османије и Шанлиурфа.

Повеќе од 14 милиони луѓе во Туркије беа погодени од земјотресите, како и голем број во Северна Сирија.

- „Туркије ќе продолжи со обновата на регионите погодени од земјотресите“ -

Турскиот претседател Реџеп Таип Ердоган преку порака на платформата X изрази почит кон 53.537 жртви во земјотресите и се помоли за милост на нивните души.

„Од првиот ден се обединивме како држава и народ, кажувајќи дека ‘сме едно’ и никогаш не ја повлековме нашата поддршка од погодените региони“, изјави тој.

Ердоган вети дека напорите за обновување ќе продолжат со „непоколеблива решителност, напорна работа и издржливост“ сè додека секој граѓанин не добие безбеден дом.

Подоцна во текот на денот Ердоган ќе присуствува на меморијална програма во Адијаман.