Admir Fazlagikj
25 Janar 2017•Përditësim: 26 Janar 2017
SHKUP (АА) – Problemi më i shpeshtë të cilin qytetarët e Maqedonisë e kanë denoncuar gjatë vitit 2016 ka qenë dyshimi në vërtetësinë e faturuar nga operatori, është konstatimi i Agjencisë për Komunikime Elektronike (AKE) e cila në një konferencë për mediat ka shpalosur të dhënat për problemet më të shpeshta të cilat janë denoncuar gjatë vitit të kaluar në fushën e komunikimeve, më konkretisht në telefoni mobile dhe fikse, raporton Anadolu Agency (AA).
Drejtori i AKE-së, Sasho Dimitrijoski tha se në numrin 190 të Qendrës së Kontaktit, në vitin 2016 janë bërë 8.410 thirrje të qytetarëve, ndërkohë që për 982 prej tyre është nisur procedurë dhe se rreth 80 përqind të rasteve janë zgjidhur.
“Problemi më i shpeshtë të cilin qytetarët e Maqedonisë e kanë denoncuar gjatë vitit 2016 ka qenë dyshimi në vërtetësinë e faturuar nga operatori, më saktë fatura e lartë, pastaj vijojnë ankesat për shërbime jocilësore, shërbim jo në kohë, roaming, etj”, tha Dimitrijoski.
Sipas analizës së bërë nga AKE, ankesa e dytë më shpesh e denoncuar ka të bëjë me shërbimet për telefoni mobile dhe internet, 18 përqind nga ankesat.
Arsyet, sipas drejtorit janë të njëjtat nga të lartpërmendurat, mirëpo sipas tij kjo dëshmon se kërkesat për shërbime më të mira flasin për rritjen e përdoruesve të internetit në Maqedoni.
Dimitrijoski tha më tej se shënojnë ulje denoncimet që kanë të bëjnë me shërbimet e roamingut, por kjo siç tha, i atribuohet fushatës së mirë informuese të Agjencisë.
“Përqindja e mosmarrëveshjeve për shërbimet në roaming përbënin vetëm 5.3 përqind të ankesave. Ky është një rezultat i aktiviteteve që kemi bërë në vitet e fundit në drejtim të informimit të konsumatorit”, tha ai.
Gjatë muajit maj të vitit 2010 AKE prezantoi Qendrën e Kontaktit 190, e cila ka për qëllim të siguroj komunikim më të mirë me përdoruesit e shërbimeve të telekomunikacionit.
Denoncimi i problemeve në Qendrën e Kontaktit qytetarët mund ta bëjnë falas nga ora 08:00 deri në ora 17:00.
