Agim Sulaj
16 Prill 2026•Përditësim: 16 Prill 2026
Ministri i Punëve të Jashtme dhe Diasporës i Kosovës, Glauk Konjufca, ka pritur në takim zëvendëskryeministrin dhe ministrin e Jashtëm të Belgjikës, Maxime Prevot, i cili po qëndron për vizitë zyrtare në Kosovë, raporton Anadolu.
Gjatë fjalës së tij pas takimit dypalësh, Konjufca vlerësoi mbështetjen belge ndaj proceseve integruese të Kosovës dhe theksoi pritjen për marrjen e pyetësorit për anëtarësim në Bashkimin Evropian (BE), duke kërkuar qartësim të mëtejshëm të rrugës drejt bllokut evropian.
Konjufca gjithashtu shprehu pritjen për përkrahjen e Belgjikës për anëtarësimin e Kosovës në Këshillin e Evropës.
“Në fushën e politikës së jashtme, Belgjika është një nga partnerët më të rëndësishëm dhe në këtë frymë ia shpreha vlerësimin tim më të lartë zëvendëskryeministrit për Evropë, për mbështetjen e tyre gjatë procesit të heqjes së masave të BE-së ndaj Kosovës, që ishte hap shumë i rëndësishëm përpara drejt aspiratave tona evropiane. Theksova pritjet që i ka Republika e Kosovës sa i përket proceseve integruese, e në radhë të parë marrjes së pyetësorit nga ana e BE-së, e cila është çështje që po bëhen tre vite e gjysmë prej kur ende nuk po trajtohet nga ana e Brukselit”, tha Konjufca.
Ministri belg Prevot deklaroi se Belgjika do të avokojë në mënyrë aktive për anëtarësimin e Kosovës në Këshillin e Evropës, duke theksuar se “tani është koha” për këtë hap, ndërsa konfirmoi përkushtimin për thellimin e bashkëpunimit dypalësh dhe mbështetjen e perspektivës evropiane të vendit.
“Duke folur për Këshillin e Evropës, në mënyrë aktive do të avokoj për anëtarësimin tuaj, jo në të ardhmen, por tani është koha. Belgjika mbetet e përkushtuar që të fuqizojë dialogun bilateral dhe të thellojë bashkëpunimin policor të integrimit, veçanërisht duke pasur parasysh rëndësinë e madhësisë së diasporës kosovare në Belgjikë”, tha ai.
Prevot vijoji se ai do të jetë një mbështetës i fuqishëm i Kosovës në integrimin evropian.
“Mesazhi im për qeverinë dhe njerëzit tuaj është i qartë: anëtarësimi në familjen e Bashkimit Evropian mbetet një perspektivë e besueshme dhe Belgjika është e gatshme që edhe më tej të mbështes aplikimin tuaj”, tha ministri belg.
Ai shtoi se stabiliteti rajonal dhe progresi në dialogun e Kosovës me Serbinë, ndërmjetësuar nga BE-ja, mbeten të rëndësishme për rrugën evropiane të Kosovës.
Dy ministrat theksuan se vizita konfirmon marrëdhëniet e mira dypalëshe dhe gatishmërinë për thellimin e bashkëpunimit në politikë të jashtme, siguri dhe fusha të tjera me interes të përbashkët.
