Bregu Perëndimor, numri i të vrarëve palestinezë rritet në 103

Sipas të dhënave të përpiluara nga Anadolu, bazuar në të dhënat zyrtare, numri i të vrarëve palestinezë në Bregun Perëndimor të okupuar që nga fillimi i konfliktit aktual më 7 tetor është rritur në 103, duke përfshirë dy në burgjet izraelite.

Ministria e Shëndetësisë, në një deklaratë njoftoi: "Katër palestinezë u vranë këtë mëngjes nga të shtënat me armë dhe nga raketat e okupuesit, duke përfshirë tre të vrarë në Jenin dhe një në Qalqilya".

Forcat ushtarake izraelite hynë në Qalqilya dhe bënë kontrolle shtëpi më shtëpi, duke rezultuar në përleshje me dhjetëra palestinezë. Dëshmitarët okularë për Anadolu thanë se ushtria përdori municion të vërtetë dhe plumba gome gjatë konfrontimeve.

Burimet mjekësore konfirmuan gjithashtu për agjencinë palestineze të lajmeve Wafa se 19-vjeçari Khaled Salam Faqhaa nga qyteti Anabta iu nënshtrua plagëve të shkaktuara nga të shtënat e ushtrisë izraelite një javë më parë.

Dje, Autoriteti për Çështjet e të Burgosurve Palestinezë dhe Klubi Palestinez i të Burgosurve njoftuan vdekjen e një të burgosuri palestinez në burgun izraelit, duke shënuar rastin e dytë të tillë në më pak se 24 orë.

Shoqatat nuk përcaktuan rrethanat rreth vdekjes së tij dhe akoma nuk ka pasur asnjë deklaratë zyrtare nga autoritetet izraelite për këtë çështje. Në deklaratë thuhet se ai është arrestuar më 22 tetor si pjesë e fushatave të fundit të arrestimit në Bregun Perëndimor.

Në Bregun Perëndimor janë dëshmuar një valë përplasjesh dhe konfrontimesh midis palestinezëve dhe ushtrisë izraelite, teksa operacioni izraelit intensifikohet dhe situata humanitare përkeqësohet në Gaza.