Emiratet e Bashkuara Arabe do të importojnë mallrat e vendbanimeve izraelite

Sipas të përditshmes izraelite "The Jerusalem Post", kompanitë izraelite në vendbanimet e ndërtuara në tokat e pushtuara palestineze do të eksportojnë mallra në Emiratet e Bashkuara Arabe, transmeton Anadolu Agency (AA).

"Kompanitë e kolonëve që prodhojnë verë, tahini, vaj ulliri dhe mjaltë kanë nënshkruar një marrëveshje me kompaninë e shpërndarjes 'Dubai Fam Holding' për të eksportuar produktet e tyre në Emiratet e Bashkuara Arabe", raportoi 'The Jerusalem Post', duke cituar një këshill për vendbanimet izraelite në veri të Bregut Perëndimor.

Produktet e vendbanimeve izraelite konsiderohen të paligjshme nga rezolutat e Ligës Arabe.

Duke e komentuar marrëveshjen e cila u nënshkrua në Dubai, kreu i këshillit të vendbanimeve, Yossi Dagan, tha se ata "po ndërtojnë një histori".

"Zona Samaria që unë përfaqësoj është e vendosur në zemrën e shtetit izraelit", tha Dagan, duke iu referuar tokave të pushtuara palestineze në pjesën veriore të Bregut Perëndimor.

Nga ana tjetër, shefi ekzekutiv i 'Dubai Fam Holding', Faisal Ali Mousa, duke folur për marrëveshjen tha se, "Ky është një qëllim shumë i madh që kemi arritur sot".

Më 15 shtator, Emiratet e Bashkuara Arabe dhe Bahreini nënshkruan dy marrëveshje për normalizimin e plotë të marrëdhënieve me Izraelin në një lëvizje që ngjalli zemërim midis palestinezëve, të cilët thonë se marrëveshjet injorojnë të drejtat e tyre dhe nuk i shërbejnë çështjes palestineze.