Fillojnë bisedimet Rusi-SHBA në Arabinë Saudite lidhur me Ukrainën

Bisedimet midis Rusisë dhe SHBA-së, që synojnë përmirësimin e marrëdhënieve midis dy kombeve dhe adresimin e konfliktit në Ukrainë, filluan sot në kryeqytetin e Arabisë Saudite, Rijad, raportojnë mediat ruse, transmeton Anadolu.

"Përpara raundit kryesor të bisedimeve, përfaqësuesit e të dy vendeve patën kontakte joformale", u tha gazetarëve Kirill Dmitriev, kreu i Fondit të Investimeve Direkte Ruse dhe një anëtar i delegacionit rus.

Sipas vlerësimeve të tij, bizneset amerikane humbën më shumë se 300 miliardë dollarë pas largimit nga tregu rus.

"Gjetja e rrugëve të përbashkëta ekonomike dhe zgjidhjeve pozitive për çështjet është jashtëzakonisht e rëndësishme kryesisht për SHBA-në dhe për shumë vende të tjera, të cilat kanë filluar të kuptojnë se tregu rus është jashtëzakonisht tërheqës dhe duhet të jetë i pranishëm", tha ai.

Zëdhënësi i Kremlinit, Dmitry Peskov tha të hënën se takimi do të fokusohet në marrëdhëniet dypalëshe Rusi-SHBA, përgatitjet për negociatat për zgjidhjen e Ukrainës dhe një takim të mundshëm midis presidentëve të dy vendeve, Vladimir Putin dhe Donald Trump.

"Arabia Saudite u zgjodh si vend, sepse është e pranueshme për të dyja palët", tha Peskov duke shtuar se është herët për pjesëmarrjen evropiane në bisedimet për gjetjen e zgjidhjes për Ukrainën.