Google financon programe trajnimi të punëtorëve për ekonominë e inteligjencës artificiale

Google po financon programe të reja kërkimore dhe trajnimi për aftësi për të përgatitur punëtorët për një ekonomi të drejtuar nga inteligjenca artificiale, transmeton Anadolu.

Sipas lajmit të "Axios", kompania po lançon tre nisma të reja trajnimi për inteligjencën artificiale, përfshirë një partneritet me Fondacionin "Johnson & Johnson" për të ndihmuar ofruesit e kujdesit shëndetësor rural të zvogëlojnë barrën administrative.

Përpjekja përfshin gjithashtu një bashkëpunim me Punët për të Ardhmen për të krijuar praktika në 100 kompani si dhe një program me Institutin e Prodhimit për të trajnuar 40 mijë punëtorë dhe për të zgjeruar praktikat në 15 rajone të reja të SHBA-së.

Google po mbledh sot gjithashtu përfaqësues të qeverisë, industrisë dhe shoqërisë civile në Washington për të "diskutuar mbi inteligjencën artificiale dhe të ardhmen e punës".

Ben Armstrong i Institutit të Teknologjisë në Masaçusets pritet të prezantojë një hulumtim mbi mënyrën se si kompanitë mund ta përdorin inteligjencën artificiale për të ndihmuar punonjësit të zvogëlojnë detyrat rutinë, duke mbështetur njëkohësisht të mësuarit dhe bashkëpunimin.

Thuhet se Google po kërkon të formësojë mënyrën se si Washingtoni i qaset inteligjencës artificiale dhe vendeve të punës përpara se politikëbërësit të krijojnë kornizën e tyre.

"IA nuk është diçka që po na ndodh. Është diçka që mund ta formësojmë ne", tha për "Axios" kryeekonomisti i Google-s, Fabien Curto Millet duke shtuar se ndikimi i IA-së në vende pune do të varet nga zgjedhjet që bëjnë kompanitë dhe qeveritë sot.