Inteligjenca turke kap të dyshuarin për sulmin terrorist të vitit 2013 në Reyhanli

Organizata Kombëtare e Inteligjencës së Turqisë (MIT) ka kapur Omer al-Khatibin, një nga të dyshuarit sirianë për sulmin terrorist të vitit 2013 në Reyhanli, ku u vranë 53 persona, teksa ai përgatitej të arratisej drejt Evropës përmes detit, raporton Anadolu.

Sipas burimeve të sigurisë, Al-Khatib, i cili kërkohej me njoftim të kuq të Interpolit, ishte i përfshirë në planifikimin dhe organizimin e sulmit në qytetin turk dhe koordinonte mes autorëve të sulmit dhe zyrtarëve të inteligjencës të lidhur me Bashar al-Assadin.

Al-Khatib e takoi Yusuf Nazikun, i cili po planifikonte operacione kundër Turqisë, me Kifah Melhemin në vitin 2013, ndërsa detajet e sulmit u përcaktuan gjatë takimeve.

Al-Khatib dhe Nazik hynë për herë të parë në Turqi përmes Hatayit në shkurt të vitit 2013, para sulmit, si dhe identifikuan vendet që do të viheshin në shënjestër. Sipas burimeve, ata morën miratimin e Melhemit, i cili ndodhej në Latakia.

Para sulmit në maj të vitit 2013, Al-Khatib shkoi së bashku me Temir Dukancin në degën e inteligjencës ushtarake në Latakia dhe mori materialet që do të përdoreshin në pajisjen shpërthyese. Automjeti i mbushur me eksploziv u dërgua në Reyhanli nga Dukanci dhe Nazik, si dhe u aktivizua me anë të një pajisjeje shpërthyese të komanduar në distancë.

Menjëherë pas sulmit, Al-Khatib dërgoi Dukancin dhe Nazikun, të cilët ishin arratisur në Siri, në degën e inteligjencës ushtarake në Latakia. Sipas burimeve, Al-Khatib dhe personat e tjerë që kryen sulmin u shpërblyen financiarisht nga regjimi i Bashar al-Assadit.

- MIT e gjurmoi të dyshuarin hap pas hapi

MIT nisi përpjekjet për kapjen e personave përgjegjës menjëherë pas sulmit në Reyhanli dhe monitoroi nga afër aktivitetet e al-Khatibit në Siri, ashtu siç bëri edhe me të dyshuarit e tjerë. MIT e kapi Al-Khatibin teksa ai përgatitej të arratisej drejt Evropës përmes detit dhe më pas e solli në Turqi.

Naziku, një nga autorët dhe planifikuesit e sulmit, u kap në vitin 2018, Cengiz Sertel në vitin 2024 ndërsa Muhammed Dib Korali dhe Dukanci në vitin 2025. Gjeneralmajori Kifah Melhem, i cili ndodhet në Siri dhe kishte dhënë urdhrin për sulmin në Reyhanli, u emërua nga Bashar al-Assadi në krye të Byrosë së Sigurisë Kombëtare në shkurt të vitit 2024.

Dihet se Melhem u arratis jashtë vendit pas rënies së regjimit të Asadit.