Melike Pala
25 shtator 2026•Përditësim: 25 shtator 2026
Kolumbia njoftoi të enjten se ka ndërprerë zyrtarisht marrëdhëniet diplomatike me Iranin për shkak të "shqetësimeve lidhur me sigurinë kombëtare dhe hemisferike", lidhjeve të pretenduara me grupe terroriste dhe narkoterroriste ndërkombëtare si dhe shkeljeve të të drejtave të njeriut, transmeton Anadolu.
Në një deklaratë, Ministria e Jashtme e Kolumbisë tha se vendimi hyri në fuqi më 19 shtator dhe u bazua në prioritetet e politikës së jashtme të qeverisë, përfshirë "luftën kundër krimit ndërkombëtar dhe mbrojtjen e sigurisë kombëtare".
"Kolumbia mori parasysh shkeljet e konfirmuara të të drejtave të njeriut, sulmet e verifikuara ndaj vendeve që nuk janë të përfshira në konfliktin në Lindjen e Mesme, bllokadën e Ngushticës së Hormuzit dhe pengimin nga autoritetet të përpjekjeve të Agjencisë Ndërkombëtare të Energjisë Atomike (IAEA) për të verifikuar shtrirjen e programit bërthamor të Iranit", tha Ministria e Jashtme.
"Këto fakte dëmtuan besimin e Kolumbisë te qeveria e Republikës Islamike të Iranit", shtoi ministria.
Presidenti i ri i Kolumbisë, Abelardo de la Espriella ka riformatuar aleancat që prej marrjes së detyrës në gusht. Ai përshpejtoi përpjekjet për të rivendosur marrëdhëniet e vendit të Amerikës së Jugut me Izraelin, duke përmbysur qëndrimin e fortë të paraardhësit Gustavo Petro ndaj gjenocidit në Gaza.
