Liderët e BE-së i bëjnë thirrje Rusisë të ndalë menjëherë krimet e luftës

Liderët e Bashkimit Evropian i bënë thirrje Rusisë të ndalë menjëherë krimet e saj të luftës dhe përsëritën mbështetjen e Unionit për Ukrainën, transmeton Anadolu Agency (AA).

Në fund të sesioneve të ditës së parë të samitit, liderët e BE-së miratuan një deklaratë lidhur me Ukrainën.

Në deklaratë thuhet se agresioni i Rusisë në Ukrainë shkel rëndë ligjin ndërkombëtar, shkakton vdekjen dhe plagosjen e njerëzve dhe vendos në objektiv popullatën civile përfshirë spitalet, shkollat dhe strehimoret.

"Krimet e luftës duhet të ndalen menjëherë. Përgjegjësit do të japin llogari përpara ligjit ndërkombëtar", thuhet në deklaratën në të cilën vihet në dukje se bllokada në Mariupol dhe mos lejimi i dërgimit të ndihmave humanitare në qytetet e tjera janë të papranueshme dhe se forcat ruse duhet të lejojnë qasjen.

Ndër të tjera në deklaratë, Rusisë i bëhet thirrje që të lejojë urgjentisht kalimin e sigurt të civilëve, qasje të pandërprerë humanitare dhe të formojë korridore humanitare.

Në deklaratë përsëritet thirrja ndaj Rusisë për të respektuar integritetin territorial të Ukrainës, ndërsa nënvizohet mbështetja e BE-së për Ukrainën dhe zgjedhjen e saj për anëtarësim në Union. Ndaj Komisionit Evropian përsëritet thirrja që të japë mendimin për anëtarësimin e Ukrainës.

"BE-ja do të vazhdojë të ofrojë mbështetje politike, financiare, materiale dhe humanitare për Ukrainën", thuhet në deklaratën në të cilën theksohet se BE-ja është e gatshme të zbatojë sanksione të reja.

Më tej u bëhet thirrje të gjitha vendeve anëtare që të veprojnë në përputhje me sanksionet, të pengojnë përpjekjet e mundshme të Rusisë për kapërcimin e sanksioneve dhe që të mos japin asnjë ndihmë ndaj këtij vendi.

Në ditën e parë të samitit mori pjesë edhe presidenti i SHBA-së, Joe Biden, ndërsa BE dhe SHBA nënshkruan një deklaratë të përbashkët dhe mbajtën qëndrim të përbashkët kundër Rusisë. Samiti do të vazhdojë në ditën e dytë me mbajtjen e një sesioni me temë "Euro Samiti" ku do të analizohen çështjet ekonomike, situatat e sektorit bankar dhe i tregjeve të kapitalit.