Mbi 82.000 izraelitë janë larguar nga vendi në vitin 2024

Më shumë se 82.000 izraelitë janë larguar nga vendi në vitin 2024 mes luftës gjenocidale të Tel Avivit në Rripin e Gazës, treguan sot shifrat zyrtare, transmeton Anadolu.

Byroja Qendrore e Statistikave e Izraelit tha se 82.700 njerëz janë larguar nga Izraeli në vitin 2024, ndërsa 23.800 janë kthyer në vend.

Byroja nuk specifikoi arsyen e largimit të izraelitëve, por raportimet e mëparshme të mediave izraelite ia atribuuan këtë raketave të lëshuara nga Libani, Rripi i Gazës dhe Jemeni.

Sipas byrosë, popullsia e Izraelit ka arritur në afërsisht 10,027 milionë, duke përfshirë 7,7 milionë hebrenj, 2,1 milionë arabë dhe 216.000 të huaj.

Rritja e popullsisë së Izraelit ka rënë me 1,1 për qind në vitin 2024, nga 1,6 për qind një vit më parë, shtoi ajo.

Ushtria izraelite ka vazhduar luftën gjenocidale në Gaza që ka vrarë mbi 45.500 viktima, kryesisht gra dhe fëmijë, që nga 7 tetori 2023, pavarësisht nga një rezolutë e Këshillit të Sigurimit të OKB-së që bën thirrje për armëpushim të menjëhershëm.

Në nëntor, Gjykata Ndërkombëtare Penale lëshoi ​​urdhra arresti për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.