Elena Teslova
14 nëntor 2019•Përditësim: 14 nëntor 2019
Mediat ruse nxorrën sot në pah politikën "jokonsistente" ndaj Turqisë pas takimit midis presidentit turk Recep Tayyip Erdoğan dhe homologut të tij amerikan Donald Trump, transmeton Anadolu Agency (AA).
Agjencia shtetërore e lajmeve "RIA Novosti" theksoi se ishte e rëndësishme që Trump të gjente terren të përbashkët me Turqinë në funksion të zgjedhjeve të ardhshme presidenciale. Gjithashtu, aty vihet në dukje se SHBA-të ndryshuan retorikën e saj nga kërcënimet e provokuara nga vendimi i Turqisë për të blerë sistemin rus të mbrojtjes ajrore S-400, drejt përpjekjeve për pajtim.
"Për SHBA-të, blerja e sistemit S-400 nga Turqia, natyrisht është një sfidë shumë serioze. Turqia është ushtria e dytë në Aleancën e Atlantikut të Veriut (NATO). Në një situatë të tillë, mosdashja (e Turqisë) për të bashkëpunuar me SHBA-të jep arsye për të dyshuar në rolin mbizotërues të SHBA-ve në botë", tha ajo, duke shtuar se kur sanksionet nuk jepnin rezultate, Washingtoni iu drejtua bisedimeve dhe pajtimit duke i ofruar Erdoğanit "marrëveshje tërheqëse".
E përditshmja "Kommersant" e përshkroi vizitën e Erdoğanit në SHBA si "një nga ato ngjarje të rralla ndërkombëtare që mund të shkaktojnë interes të vërtetë njëkohësisht në dhjetëra kryeqytete".
Duke theksuar mospërputhjen e marrëdhënieve të Washingtonit me Turqinë, më tej thuhet se SHBA-të shpesh kalojnë midis taktikave të ndryshme, përfshirë kërcënimet, premtimet dhe shantazhet.
Gazeta gjithashtu hodhi dyshime lidhur me mundësinë që Trump të mund të përmbushte premtimet e tij ndaj Ankarasë, pasi ai aktualisht ndodhet nën kërcënimet e impiçmentit dhe në konflikt me Kongresin, miratimi i të cilit kërkohet për shumicën e marrëveshjeve ushtarake.
Gazeta zyrtare "Rossiyskaya Gazeta" theksoi gjithashtu politikën kontradiktore amerikane ndaj Turqisë, duke treguar gatishmërinë e Washingtonit për "të njohur të drejtën e Ankarasë për një politikë të jashtme të pavarur".
"Megjithëse presidenti i SHBA-ve është miqësor me homologun e tij turk, nën presionin e elitës amerikane, ai është detyruar vazhdimisht të godasë Turqinë", shkruante e përditshmja, duke shtuar se ushtria dhe Kongresi Amerikan ishin 'armiqësore' ndaj Erdoğanit.
Ai gjithashtu rikujtoi "sulmet agresive" kundër presidentit turk, nga kreu i Komitetit të Punëve të Jashtme të Kongresit të SHBA-ve, Eliot Engel, duke sugjeruar që edhe nëse Trump i ka bërë propozime Erdoğanit, nuk është e qartë nëse ato do të përshtaten me ligjvënësit në Capitol Hill.
