Në luftën midis Rusisë dhe Ukrainës, njësitë e tankeve ukrainase të vendosura në frontin e Khersonit hapin zjarr intensiv dhe mbështesin përparimin e këmbësorisë, raporton Anadolu Agency (AA).
Njësitë e tankeve të ushtrisë ukrainase të dislokuara në frontin e Khersonit, ku përdoren armë të rënda si avionë luftarakë, helikopterë ushtarakë dhe sisteme artilerie, janë në shërbim 24 orë.
Aktivitetet e njësive tankiste të Brigadës së 59-të të Mekanizuar, e cila është e dislokuar në pika të ndryshme të frontit janë filmuar nga ekipi i AA-së.
Tanket e dëmtuara në luftime ose që kanë nevojë për mirëmbajtje teknike riparohen nga ekspertë në ajër të hapur në pika të caktuara në pjesën e përparme.
Rreshteri 55-vjeçar Vasiliy, komandanti i një ekipi tankesh që po përgatitej të kthehej në detyrë pasi qëlloi në pozicionet e forcave ruse, tërhoqi vëmendjen për faktin se përdorimi efektiv i tankeve në luftë nënkuptonte forcimin e përparimit të ushtrisë.
Ai theksoi se forcat e Rusisë hapnin zjarr intensiv drejt pozicioneve të tyre çdo ditë. "Ne jemi në detyrë çdo ditë. Këtu përdoren tanket në mënyrë aktive. Udhëzimi që na është dhënë është të hapim zjarr mbështetës për përparimin e këmbësorisë. Ndonjëherë shkojmë në një mision për të gjuajtur 2-3 herë në ditë. Tanku ynë mund të godasë objektiva në distancë deri në 10 kilometra", tha Vasiliy.
Shoferi i tankut, Jenya 29-vjeç tha se ai ka qenë në front që nga 24 shkurti, kur Rusia filloi luftën në Ukrainë.
Duke shpjeguar se ai shërbeu në ushtri para fillimit të luftës dhe tani vazhdon të mbrojë vendin e tij si shofer tanku, Jenya tha: "Tanku është një automjet i blinduar si në çdo mision në luftë është e rrezikshme të jesh brenda në tank, por jemi mësuar".
Ai thotë se janë të gatshëm të shkojnë në detyrë në çdo kohë. "Ne jemi në front 24 orë në ditë. Ushtria ukrainase po përdor në mënyrë aktive tanke në frontin e Khersonit", thekson Jenya.
